కోదండ రాముడి తల తొలగించిన దుండగులు 

రామతీర్థంలోని శ్రీరామస్వామి దేవస్థానం పక్కనే సుమారు 800 అడుగుల ఎత్తులో ఉన్న బోడికొండపై కోదండ రామాలయం ఉంది. మంగళవారం ఉదయం అర్చకుడు వెళ్లేసరికి ఆలయ తలుపులకు తాళం లేకపోవడంతో అధికారులకు సమాచారం అందించారు. వారు నెల్లిమర్ల పోలీసులకు తెలిపారు. అందరూ కలసి ఆలయం లోపల పరిశీలించగా శ్రీరామచంద్రస్వామి విగ్రహం తల తెగి ఉండడాన్ని గుర్తించారు. వెంటనే తల భాగం కోసం పరిసరాల్లో వెతికినా ఎక్కడా దొరకలేదు. పోలీస్‌ జాగిలాలు, క్లూస్‌ టీమ్‌ ప్రతినిధులు ఆధారాల సేకరణ ప్రారంభించారు.

కోదండరాముని విగ్రహ ధ్వంసం ఘటనకు నిరసగా తెలుగుదేశం పార్టీ ఆందోళన చేపట్టనుంది. పార్టీ కార్యాలయం నుంచి ఆలయం వరకు మౌన ప్రదర్శన నిర్వహిస్తామని విజయనగరం నియోజకవర్గ టీడీపీ ఇన్‌చార్జి అదితి గజపతిరాజు తెలిపారు. మరోవంక, ఈ విగ్రహం తల  తొలగించిన దుండగుల దురాగతాల్ని భారతీయ జనతా పార్టీ తీవ్రంగా ఖండించింది. ఈ సంఘటనపై బిజెపి జిల్లా అధ్యక్షులు శ్రీమతి రెడ్డి పావని మంగళవారం మధ్యాహ్నం అనేక మంది కార్యకర్తలతో బయలుదేరి జరిగిన ఘటనను సందర్శించారు.