తెలంగాణలో భారీ కరోనా కేసులతో లాబ్స్ బంద్!

తెలంగాణలో కొత్తగా ఒకే రోజు  1,087 కరోనా పాజిటివ్ కేసులు నమోదయి, ఆరుగురు మృతి చెందారు. ఇప్పటివరకూ 13,436 మందికి కరోనా పాజిటివ్ నిర్ధారణ కాగా మొత్తం 243 మంది మృతి చెందారు. 

 గ్రేటర్ హైదరాబాద్ పరిధిలో పది రోజులలో 50,000 టెస్టులు చేస్తున్నట్లు సీఎం కేసీఆర్ ప్రకటించిన తర్వాత వరుసగా కేసులు భారీగా పెరుగుతూ వస్తున్నాయి. దానితో రాష్ట్రంలో కరోనా కట్టడిలో ఉన్నట్లు ప్రభుత్వం చేస్తున్న ప్రచారం డొల్లతనం వెల్లడైనది. 

  టెస్టులు చేయించుకుంటున్న ప్రతి నలుగురైదుగురిలో ఒకరికి పాజిటివ్ వచ్చింది.   దానితో వెంటనే  ప్రభుత్వ ల్యాబ్ లు పడక వేయడం, ప్రైవేట్ ల్యాబ్ లను సహితం మూత వేయించే ప్రయత్నం చేస్తుంటే  కరోనా టెస్ట్ లకు కేసీఆర్ ప్రభుత్వం మంగళం పాడనున్నట్లు వెల్లడవుతుంది.

ప్రభుత్వ ల్యాబ్ లలో నమూనాలు పేరుకు పోవడంతో మూడు, నాలుగు రోజులుగా కొత్తగా నమూనాలను తీసుకోవడం లేదు. వైరస్ లక్షణాలతో వచ్చినోళ్లను కూడా వెనక్కి తిప్పి పంపుతున్నారు. 

మరోవంక  ప్రైవేటు ల్యాబ్​ లకు టెస్ట్ లు జరపడానికి అనుమతిచ్చిన ప్రభుత్వం పది రోజులలోనే నిపుణుల కమిటీతో తనిఖీ చేయించి అక్కడ నిబంధనలు పాటించడం లేదని అంటూ వంకలు పెడుతున్నది. వాటిని మూయించడం కోసమే అన్నట్లు పలువురు భావిస్తున్నారు.

ప్రైవేట్ ల్యాబ్ లలో టెస్ట్ లు సరిగ్గా చేయడం లేదని,  వైరస్ లేనోళ్లకు కూడా ఉన్నట్టు రిపోర్టులు ఇస్తున్నారని వైద్యారోగ్యశాఖ ప్రకటించింది. దీంతో టెస్టుల కోసం ఎక్కడికి పోవాలో తెలియక జనం తలలు పట్టుకుంటున్నరు. ప్రభుత్వ దవాఖాన్లలో ఉన్న అధ్వాన పరిస్థితి గురించి, డాక్టర్లు, సిబ్బంది కొరత గురించి ఎన్నడూ మాట్లాడని రాష్ట్ర ప్రభుత్వం ప్రైవేటు ల్యాబ్​ల్లో పరిశుభ్రత లేదని గుర్తించినట్లు ప్రకటించింది.

ఏడాది కిందట డెంగీ, క్లినికల్‌‌ ట్రయల్స్‌‌పై వేసిన కమిటీ రిపోర్టులను ఇప్పటికీ వెల్లడించని ప్రభుత్వం   ప్రైవేటు ల్యాబ్​ల్లో లోపాలను గుర్తిస్తూ నిపుణుల కమిటీ ఇచ్చిన రిపోర్టులోని అంశాలను మాత్రం మీడియాకు విడుదల చేయడం విస్మయం కలిగిస్తుంది. కరోనా టెస్టులు చేస్తున్న 18 ప్రైవేటు ల్యాబ్​లలో 16 ల్యాబ్​లను కమిటీ ఇన్‌‌స్పెక్షన్ చేసి  నిబంధనలు పాటించడం లేదని పేర్కొంది.