* జెనీవాలో జరుగుతున్న ఐఎల్ఓ సదస్సులో బిఎంఎస్ సంఘటన కార్యదర్శి బి సురేంద్రన్
ఐఎల్ఓ డైరెక్టర్ జనరల్ గిల్బర్ట్ ఎఫ్. హౌంగ్బోనాయకత్వాన్ని అభినంస్తూ, ఆయన సమర్పించిన “ఎంపిక చేసుకునే క్షణం: గౌరవప్రదమైన పని కోసం కృత్రిమ మేధస్సును ఉపయోగించుకోవడం” అనే నివేదికను స్వాగతిస్తూ ‘నూతన సాంకేతికతలు, కృత్రిమ మేధస్సు’ మానవులకు సహాయపడటానికే కానీ, వారి స్థానాన్ని భర్తీ చేయడానికి కాదు’ అన్నది ప్రాథమిక దృక్పథంగా ఉండాలని భారతీయ మజ్దూర్ సంఘ్ (బిఎంఎస్) సంఘటనా కార్యదర్శి బొజ్జి సురేంద్రన్ స్పష్టం చేశారు.
జెనీవాలో జరుగుతున్న 114వ అంతర్జాతీయ కార్మిక సంస్థ (ఐఎల్ఓ) 114వ అంతర్జాతీయ కార్మిక సదస్సులో భారత కార్మికుల ప్రతినిధిగా ప్రసంగిస్తూ
న్యాయబద్ధమైన, సమ్మిళితమైన, పటిష్టమైన, మానవ కేంద్రీకృతమైన భవిష్యత్ కార్యక్షేత్రాన్ని నిర్మించాలనే తన అచంచలమైన నిబద్ధతను భారతీయ మజ్దూర్ సంఘ్ పునరుద్ఘాటిస్తోందని ఆయన తెలిపారు.
సాంకేతిక పరివర్తన, జనాభా మార్పు, ప్రపంచ ఆర్థిక అనిశ్చితి వల్ల ఎదురయ్యే అవకాశాలు, సవాళ్లను మనం ఎదుర్కొంటున్న ఈ తరుణంలో, ఆవిష్కరణలు మానవాళికి సేవ చేసేలా, అభివృద్ధి అందరికీ ప్రయోజనం చేకూర్చేలా, ప్రతి కార్మికుడు గౌరవం, భద్రత, సామాజిక న్యాయాన్ని పొందేలా చూసేందుకు మనమందరం కలిసికట్టుగా కృషి చేద్దామని ఆయన పిలుపిచ్చారు.
సంఘీభావంతో, ఉమ్మడి సంకల్పంతో, కార్యక్షేత్రంలో గౌరవప్రదమైన పనిని ప్రోత్సహించాలనే ఐఎల్ఓ మహోన్నత లక్ష్యాన్ని ముందుకు తీసుకువెళదామని చెప్పారు. ప్రపంచ నిరుద్యోగం 4.9% వద్ద స్థిరంగా ఉంటుందని అంచనా వేస్తున్న తరుణంలో, 40 కోట్ల మందికి పైగా ప్రజలను ప్రభావితం చేస్తున్న ప్రపంచవ్యాప్త ఉద్యోగ ఖాళీల కొనసాగింపు, కేవలం ఉపాధి మాత్రమే సరిపోదనే విషయాన్ని స్పష్టంగా గుర్తుచేస్తుందని ఆయన చెప్పారు. గౌరవప్రదమైన వేతనాలు, సామాజిక భద్రత, వృత్తిపరమైన భద్రత, నైపుణ్యాభివృద్ధికి అవకాశాలు కల్పించే నాణ్యమైన ఉద్యోగాలను సృష్టించడంపై అంతర్జాతీయ సమాజం సమానంగా దృష్టి సారించాలని సురేంద్రన్ పిలుపిచ్చారు. .
పశ్చిమ ఆసియాలో కొనసాగుతున్న ఉద్రిక్తతలు, సంఘర్షణలు ప్రపంచవ్యాప్తంగా కార్మికులలో తీవ్ర ఆందోళన కలిగిస్తున్నాయని చెబుతూ భారతదేశం వంటి దేశాలకు ఈ పరిణామాలు కార్మిక చలనశీలత, విదేశీ ఉపాధి అవకాశాలు, రెమిటెన్స్ ప్రవాహాలు, సరఫరా గొలుసులు, సూక్ష్మ, చిన్న, మధ్య తరహా పరిశ్రమల సుస్థిరతపై ప్రభావం చూపుతాయని ఆయన ఆందోళన వ్యక్తం చేశారు. సంఘర్షణలతో నిండిన ప్రపంచంలో, శాంతియుత సంభాషణలను ప్రోత్సహించడంలో, విధానపరమైన జోక్యాలు చేపట్టడంలో, శాశ్వత పరిష్కారాలపై చర్చించడంలో, ప్రజలలో విశ్వాసాన్ని పెంపొందించడంలో కార్మిక సంఘాల పాత్ర పెరుగుతోందని ఆయన స్పష్టం చేశారు.
శ్రమ ఓ సరుకు కాదు.. మానవ మూలధనం
“శ్రమ ఒక సరుకు కాదు” అని ఐఎల్ఓ డైరెక్టర్ జనరల్ పునరుద్ఘాటించారని పేర్కొంటూ శ్రమ అనేది మానవ మూలధనమని బీఎంఎస్ బలంగా భావిస్తోందని తెలిపారు. కానీ “నియామకం,తొలగింపు”తో సహా కార్మికులను ప్రభావితం చేసే అన్ని రుగ్మతలకు “కార్మిక మార్కెట్” అనే విరుద్ధార్థక పదం కేంద్ర బిందువుగా మారిందని ఆయన విచారం వ్యక్తం చేశారు. ఈ పదాన్ని ఉపయోగించకుండా ఉండాలని, దాని స్థానంలో “కార్మిక శక్తి” వంటి సముచితమైన, గౌరవప్రదమైన పదాన్ని వాడాలని సురేంద్రన్ అన్ని సభ్య దేశాలకు విజ్ఞప్తి చేశారు.
దేశీయ, సరిహద్దుల మీదుగా జరిగే కార్మిక వలసలు ప్రపంచవ్యాప్తంగా ఒక ముఖ్యమైన ఆందోళనగా మిగిలి ఉన్నాయని పేర్కొంటూ అభద్రమైన ఉపాధి ఏర్పాట్లు, సరిపోని సామాజిక రక్షణ, బలహీనమైన అమలు యంత్రాంగాల కారణంగా వలస కార్మికులు తరచుగా దుర్బలత్వాలను ఎదుర్కొంటారని తెలిపారు. గౌరవప్రదమైన పని, సురక్షితమైన వలస, ప్రయోజనాల బదిలీ సౌలభ్యం, సమానత్వం కల్పించడం అనేది ప్రపంచవ్యాప్తంగా ప్రభుత్వాలు, యజమానులు, కార్మిక సంఘాల సమిష్టి బాధ్యతగా మిగిలి ఉందని ఆయన చెప్పారు.
ప్రపంచ మానవాళిలో దాదాపు ఐదవ వంతు మందికి నిలయమైన భారతదేశం, నేడు ప్రపంచ ఆర్థిక పరివర్తనలో అగ్రగామిగా నిలుస్తోందని సురేంద్రన్ తెలిపారు. లక్షలాది మంది కార్మికుల అంకితభావం, నైపుణ్యం, దృఢ సంకల్పం ఈ పురోగతికి దోహదపడ్డాయని, వారి కృషి జాతీయ అభివృద్ధిని, ప్రపంచ ఆర్థిక వృద్ధిని నిరంతరం ముందుకు నడిపిస్తోందని చెప్పారు.
భారత్ లో అత్యధిక సామాజిక భద్రతా కవరేజీ
ప్రపంచంలోనే కార్మికులకు అత్యధిక సామాజిక భద్రతా కవరేజీని సాధించినందుకు భారతదేశానికి ప్రపంచ గుర్తింపు లభించిందని ఆయన తెలిపారు. ప్రస్తుతం 64% కార్మిక శక్తి వివిధ సామాజిక భద్రతా పథకాల పరిధిలోకి వస్తుందని, మలేషియాలోని కౌలాలంపూర్లో జరిగిన ప్రపంచ సామాజిక భద్రతా సదస్సులో అంతర్జాతీయ సామాజిక భద్రతా సంఘం (ఐఎస్ఎస్ఎ) ఈ అవార్డును ప్రదానం చేసిందని గుర్తు చేశారు.
సమానమైన వ్యవహారం, గౌరవం, మర్యాద అనే సూత్రం, వేగంగా విస్తరిస్తున్న ప్లాట్ఫామ్, గిగ్ ఎకానమీలో నిమగ్నమైన కార్మికులతో సహా ప్రతి వర్గం కార్మికులకు వర్తించాలని ఆయన సూచించారు. గిగ్, ప్లాట్ఫామ్ కార్మికులకు సామాజిక భద్రతా రక్షణలను విస్తరించడంలో భారత ప్రభుత్వం, కొన్ని రాష్ట్ర ప్రభుత్వాలు చేస్తున్న ప్రయత్నాలను ఆయన అభినందించారు. డిజిటల్ ఆర్థిక వ్యవస్థలో ఏ కార్మికుడూ వెనుకబడిపోకుండా చూసే దిశగా ఈ చర్యలు ముఖ్యమైన ముందడుగులను సూచిస్తాయని చెప్పారు.
More Stories
ఆసియాలోనే అత్యంత పొడవైన రోడ్ టన్నెల్ జోజిలా బ్రేక్ త్రూ
దేశంలో సంతానోత్పత్తిలో తీవ్రమైన క్షీణత
ఆయిల్, గ్యాస్ సంక్షోభంతో మందుల కొరత ఏర్పడే ప్రమాదం!