మహిళల సాధికారతకు మద్దతుగా బీజేపీ స్కూటీ ర్యాలీ

భారతీయ జనతా యువమోర్చా ఆధ్వర్యంలో మహిళల సాధికారతకు మద్దతుగా, అలాగే మహిళలకు 33% రిజర్వేషన్ల బిల్లుకు అనుకూలంగా, బిజెపి తెలంగాణ రాష్ట్ర మహిళా మోర్చా, యువమోర్చాలో ఆధ్వర్యంలో స్కూటీ ర్యాలీ నిర్వహించారు. ఈ ర్యాలీలో మహిళలు పెద్దఎత్తున పాల్గొన్నారు. ఈ కార్యక్రమానికి ముఖ్య అతిథిగా బిజెపి తెలంగాణ రాష్ట్ర అధ్యక్షుడు ఎన్.రాంచందర్ రావు   హాజరయ్యారు.

ఈ సందర్భంగా వందలాది మంది మహిళలు, యువతీయువకులు భారీ ఎత్తున ర్యాలీలో పాల్గొని, ప్రధాని నరేంద్ర మోదీ నాయకత్వంలోని కేంద్ర ప్రభుత్వానికి ధన్యవాదాలు తెలుపుతూ హర్షాతిరేకాలు వ్యక్తం చేశారు. ఈ సందర్భంగా బిజెపి రాష్ట్ర అధ్యక్షుడు  రాంచందర్ రావు మాట్లాడుతూ  మహిళలకు చట్టసభల్లో 33% రిజర్వేషన్ల అంశం గత 30 సంవత్సరాలుగా పెండింగ్‌లో ఉందని, యూపీఏ ప్రభుత్వ కాలంలో కాంగ్రెస్, మిత్రపక్షాల ఒత్తిడితో ఈ బిల్లును ముందుకు తీసుకురాలేదని విమర్శించారు.

అయితే ప్రధాని నరేంద్ర మోదీ నాయకత్వంలో, అన్ని పార్టీలను ఒప్పించి పార్లమెంటులో ‘నారీ శక్తి వందన్ అధినియమ్’ బిల్లును ఆమోదింపజేసిన ఘనత కేంద్ర ప్రభుత్వానిదే అని స్పష్టం చేశారు. అయితే ఇప్పుడు కాంగ్రెస్ పార్టీ ఈ బిల్లు అమలుకు అడ్డంకులు సృష్టించేలా కుట్రలు చేస్తోందని మండిపడ్డారు.  ఈ బిల్లు అమలవకుండా చేయాలనే దురుద్దేశంతో కాంగ్రెస్ పార్టీ, ముఖ్యమంత్రి రేవంత్ రెడ్డి, ఇండియా కూటమి పార్టీలు కలిసి తప్పుడు ప్రచారం చేస్తున్నారని ధ్వజమెత్తారు.