అక్టోబర్ లో జీఎస్టీ వసూళ్లు మరోసారి రికార్డు స్థాయికి చేరుకున్నాయి. అక్టోబర్ నెలలో జీఎస్టీ ఆదాయం భారీగా పెరిగి రూ.2.31 లక్షల కోట్లకు పైగా నమోదైంది. గత ఏడాది ఇదే నెలలో వచ్చిన వసూళ్లతో పోలిస్తే ఈసారి ఏకంగా 23 శాతం వృద్ధి నమోదైంది. ఇందులో కేంద్ర జీఎస్టీ (సిజిఎస్టి) ద్వారా రూ.42,935 కోట్లు, రాష్ట్ర జీఎస్టీ (ఎస్ జీఎస్టీ) ద్వారా రూ.51,340 కోట్లు, సమీకృత జీఎస్టీ (ఐజిఎస్టి) ద్వారా రూ.1.37 లక్షల కోట్ల ఆదాయం సమకూరింది.
ముఖ్యంగా పండుగల సీజన్ నేపథ్యంలో దేశవ్యాప్తంగా వినియోగదారుల కొనుగోళ్లు పెరగడం, మార్కెట్లలో వ్యాపార లావాదేవీలు జోరందుకోవడం ఈ భారీ వసూళ్లకు ప్రధాన కారణాలుగా నిలిచాయి. మరోవైపు దిగుమతులపై విధించే పన్నుల ద్వారా వచ్చే ఆదాయం కూడా గణనీయంగా పెరిగింది. గత ఏడాదితో పోలిస్తే దిగుమతులపై వచ్చే జీఎస్టీ ఆదాయం ఏకంగా 42 శాతం వృద్ధి చెందడం విశేషం. అంతర్జాతీయ వాణిజ్య కార్యకలాపాలు, దిగుమతుల పరిమాణం పెరగడం కూడా ఈ వృద్ధికి దోహదం చేశాయి.
పండుగల సమయంలో వస్త్రాలు, ఎలక్ట్రానిక్స్, వాహనాలు, గృహోపకరణాలు తదితర రంగాల్లో కొనుగోళ్లు పెరగడం దేశీయ మార్కెట్‌లో వినియోగ డిమాండ్‌ను సూచిస్తోంది. జీఎస్టీ వసూళ్లలో నమోదైన ఈ భారీ వృద్ధి ప్రభుత్వ ఆదాయానికి బలాన్నివ్వడమే కాకుండా దేశ ఆర్థిక కార్యకలాపాల్లో పెరుగుతున్న చురుకుదనాన్ని ప్రతిబింబిస్తోంది. రానున్న నెలల్లోనూ వినియోగదారుల డిమాండ్, వ్యాపార లావాదేవీలు ఇదే స్థాయిలో కొనసాగితే పన్ను వసూళ్లు మరింత పెరిగే అవకాశముంది.
About The Author
More Stories
మహాదేవ్ యాప్ బెట్టింగ్ కింగ్‌పిన్ సౌరభ్ ను అప్పగించిన ఒమన్‌
ఏడాదిలో 5.83 శాతం తగ్గిన బొగ్గు దిగుమతులు
ఏపీ మీదుగా పట్టాలెక్కిన బెంగళూరు వందే భారత్ స్లీపర్