ఏడాదిలో 5.83 శాతం తగ్గిన బొగ్గు దిగుమతులు

భారతదేశంలో మొత్తం బొగ్గు దిగుమతులు గత ఏడాది ఆగస్టు నుండి ఈ ఏడాది ఆగస్టు నాటికి 5.83 శాతం తగ్గాయి. గత ఏడాది ఆగస్టుతో పోలిస్తే, బొగ్గు ,111 మిలియన్ టన్నుల నుండి 104 మిలియన్ టన్నులకు తగ్గినట్లు కేంద్ర బొగ్గు మంత్రిత్వ శాఖ వెల్లడించింది. దేశీయ బొగ్గు ఉత్పత్తిని పెంచడం, లభ్యతను మెరుగుపరచడం, సరఫరా వ్యవస్థను బలోపేతం చేయడం ద్వారా, దిగుమతి చేసుకున్న బొగ్గుపై దేశానికి ఉన్న ఆధారపడటాన్ని తగ్గించేందుకు చేస్తున్న నిరంతర ప్రయత్నాల ఫలితమే ఈ తగ్గుదల అని మంత్రిత్వ శాఖ పేర్కొంది.

వివిధ విద్యుత్ కేంద్రాల్లో బొగ్గు దిగుమతులు తగ్గుముఖం పట్టాయని తెలిపిన మంత్రిత్వ శాఖ, విద్యుత్ కేంద్రాల విషయానికి వస్తే, గత ఏడాది ఆగస్టులో 22 మిలియన్ టన్నులుగా ఉన్న దిగుమతులు, ఈ ఏడాది ఆగస్టు నాటికి 21 మిలియన్ టన్నులకు (6 శాతం తగ్గుదల) చేరుకున్నాయని పేర్కొంది. దేశీయ బొగ్గు ఆధారిత విద్యుత్ కేంద్రాల్లో మిశ్రమం కోసం చేసే బొగ్గు దిగుమతులు ఈ కాలంలో 4 మిలియన్ టన్నుల నుండి 3 మిలియన్ టన్నులకు, అంటే 35 శాతం తగ్గాయి.

అదే సమయంలో, కోకింగ్ కోల్ దిగుమతులు 28 మిలియన్ టన్నుల నుండి 27 మిలియన్ టన్నులకు, అంటే 4 శాతం తగ్గుదలని నమోదు చేశాయి. గత ఏడాది ఆగస్టుతో పోలిస్తే, బొగ్గు ఆధారిత విద్యుత్ కేంద్రాల వినియోగంలో 0.98 శాతం స్వల్ప పెరుగుదల నమోదైనట్లు కూడా మంత్రిత్వ శాఖ పేర్కొంది. భారతదేశ మొత్తం బొగ్గు వినియోగంలో దిగుమతి చేసుకున్న బొగ్గు వాటా, గత ఏడాది ఆగస్టులో 21 శాతంగా ఉండగా, ఈ ఏడాది ఆగస్టు నాటికి 19 శాతానికి తగ్గిందని (1.90 శాతం పాయింట్ల తగ్గుదల) వివరించింది.

దేశీయ బొగ్గు ఉత్పత్తిని మరియు వినియోగాన్ని పెంచడం, ‘ఫస్ట్ మైల్ కనెక్టివిటీ’ని (గనుల నుండి రవాణా వ్యవస్థను) బలోపేతం చేయడం, బొగ్గు తరలింపు మౌలిక సదుపాయాలను మెరుగుపరచడం మరియు థర్మల్ విద్యుత్ కేంద్రాల్లో బొగ్గు నిల్వ స్థాయిలను నిరంతరం పర్యవేక్షించడంపై తమ దృష్టి కొనసాగుతుందని మంత్రిత్వ శాఖ స్పష్టం చేసింది.