ఈ20 పెట్రోల్‌లో అధిక క్లోరైడ్ లేదా నీటి కాలుష్యం ఆధారాలు లేవు

ఈ20 పెట్రోల్‌లో అధిక క్లోరైడ్ లేదా తేమ కాలుష్యం ఉందన్న ఇటీవలి ఆరోపణలను బలపరిచేందుకు దేశవ్యాప్తంగా జరిపిన విస్తృత పరీక్షలలో ఎటువంటి ఆధారాలు లభించలేదని, సరఫరా గొలుసు అంతటా పరీక్షించిన నమూనాలు నిర్దేశిత నాణ్యతా పరిమితుల్లోనే ఉన్నాయని ఆయిల్ మార్కెటింగ్ కంపెనీలు తెలిపాయి. ఇథనాల్-బ్లెండెడ్ మోటార్ స్పిరిట్ (ఈబీఎంఎస్), లేదా ఈ 20 పెట్రోల్‌లో తేమ, క్లోరైడ్ ఉన్నాయనే ఆరోపణలపై ఇటీవల మీడియాలో వచ్చిన నివేదికల నేపథ్యంలో ఈ పరీక్షలు చేపట్టారు.

రిఫైనరీలు, డిస్టిలరీల నుండి డిపోలు, ట్యాంక్ ట్రక్కులు, రిటైల్ అవుట్‌లెట్ల వరకు మొత్తం సరఫరా గొలుసు అంతటా ఈ అదనపు పర్యవేక్షణ జరిగిందని ఆయిల్ కంపెనీలు తెలిపాయి. “శాస్త్రీయంగా రూపొందించిన పరీక్షల ద్వారా విస్తృతంగా, యాదృచ్ఛికంగా జరిపిన పరిశీలనల ఆధారంగా, ఇంధన కాలుష్యం విషయంలో ఆందోళన చెందాల్సిన అవసరం లేదని ఆధారాలు చూపిస్తున్నాయి,” అని పేర్కొన్నాయి. 

ఇంధన నాణ్యత తమకు అత్యంత ప్రాధాన్యత అని, వాహన పనితీరు లేదా వినియోగదారుల విశ్వాసాన్ని ప్రభావితం చేసే ఏ సమస్య అయినా శాస్త్రీయ పరిశోధన, దిద్దుబాటు చర్యల ద్వారా పరిష్కరించబడుతుందని ఆ కంపెనీలు తెలిపాయి. పెట్రోల్ మిశ్రమంలో ఉపయోగించే ఇథనాల్ కోసం ప్రభుత్వం కఠినమైన క్లోరైడ్ నిర్దేశాలను సూచించింది, సరఫరా గొలుసు అంతటా పర్యవేక్షణ యంత్రాంగాలను ఏర్పాటు చేసింది.

రిఫైనరీలు, డిస్టిలరీలు, డిపోలు, టెర్మినళ్లు, రిటైల్ అవుట్‌లెట్‌లతో సహా పలు దశలలో క్లోరైడ్ స్థాయిలను తనిఖీ చేస్తున్నారు. ఈ ముమ్మర నిఘాలో భాగంగా, ఆయిల్ మార్కెటింగ్ కంపెనీలు రిటైల్ అవుట్‌లెట్‌లలో నీటి ప్రవేశం, సాంద్రత తనిఖీలను కూడా పెంచాయి. రోజుకు 8-12 సార్లు పరీక్షలు నిర్వహిస్తున్నారు. వివిధ ప్రదేశాలలో మొబైల్ ఇంధన-నాణ్యత పరీక్షా ప్రయోగశాలలను ఏర్పాటు చేశారు. అదే సమయంలో నమూనాలను ఇంధన ప్రయోగశాలల ద్వారా స్వతంత్రంగా ధృవీకరిస్తున్నారు.

ఆయిల్ మార్కెటింగ్ కంపెనీల ప్రకారం, వివిధ రిఫైనరీల నుండి యాదృచ్ఛికంగా ఎంపిక చేసిన 100కు పైగా పెట్రోల్ నమూనాలను పరీక్షించగా, అన్ని నమూనాలలో క్లోరైడ్ స్థాయిలు 1 పిపిఎం వద్ద లేదా అంతకంటే తక్కువగా నమోదయ్యాయి. ఈ20 పెట్రోల్‌లో ప్రధాన మిశ్రమాంశమైన, డిస్టిలరీల నుండి సరఫరా అయ్యే ఇథనాల్‌లో కూడా క్లోరైడ్ స్థాయిలు నిర్దేశిత పరిమితి కంటే గణనీయంగా తక్కువగా ఉన్నట్లు కనుగొన్నారు.

సెంటర్ ఫర్ హై టెక్నాలజీ (సి హెచ్ టి) ప్రతినిధులతో కూడిన ఒక ప్రత్యేక టాస్క్ ఫోర్స్, గత 10 రోజులుగా దేశవ్యాప్తంగా 80 డిస్టిలరీల నుండి ఇథనాల్ నమూనాలను పరీక్షించింది. అన్ని నమూనాలలో క్లోరైడ్ స్థాయిలు 3 పిపిఎం కంటే తక్కువగా నమోదయ్యాయి.

డిపోలు, టెర్మినళ్లలో ఈ20 పెట్రోల్

దేశవ్యాప్తంగా ఉన్న ఆయిల్ మార్కెటింగ్ కంపెనీల డిపోలు, టెర్మినళ్ల నుండి సేకరించిన 80కి పైగా ఇథనాల్, ఈ20 పెట్రోల్ నమూనాలలో కూడా క్లోరైడ్ స్థాయిలు 3 పిపిఎం కంటే తక్కువగా నమోదయ్యాయని కంపెనీలు తెలిపాయి. ముమ్మర పర్యవేక్షణ కార్యక్రమంలో భాగంగా రిటైల్ అవుట్‌లెట్లలో 1,000కి పైగా నమూనాలను సేకరించారు. క్లోరైడ్ పరిమాణం కోసం ఇప్పటివరకు విశ్లేషించిన 160 పరీక్షా నివేదికలలో, దాని స్థాయిలు 0-3 పిపిఎం పరిధిలో ఉన్నట్లు తేలింది. 

క్లోరైడ్ గాఢతలు అనేక వందల పార్ట్స్ పర్ మిలియన్ (పిపిఎం) వరకు ఉన్నాయన్న వాదనలకు ఇది విరుద్ధంగా ఉంది. పర్యవేక్షణ కార్యక్రమంలో, క్లోరైడ్ స్థాయిలు అధికంగా ఉన్న నాలుగు వేర్వేరు ఉదంతాలను గుర్తించారు. ఈ అవుట్‌లెట్ల నుండి సరఫరాలను వెంటనే నిలిపివేశారు. ఆ తర్వాత, సరఫరాలను పునరుద్ధరించడానికి ముందు, వివరణాత్మక మూల-కారణ విశ్లేషణ, దిద్దుబాటు చర్యలు చేపట్టారు. 

నీటి చొరబాటు తనిఖీలు

సుమారు 90,000 రిటైల్ అవుట్‌లెట్లు భూగర్భ నిల్వ ట్యాంకుల తప్పనిసరి తనిఖీలు, పర్యవేక్షణను ప్రారంభించాయి. ట్యాంకులలోకి నీరు చేరే అవకాశం ఉందేమోనని రోజుకు 8-12 సార్లు తనిఖీ చేస్తున్నారు. ఆయిల్ మార్కెటింగ్ కంపెనీల ప్రకారం, ఇప్పటివరకు జరిగిన తనిఖీలలో ఎటువంటి నీటి చొరబాటును గుర్తించలేదు. పరీక్ష ఫలితాల పట్టికా సారాంశం సెంటర్ ఫర్ హై టెక్నాలజీ అధికారిక వెబ్‌సైట్‌లో అందుబాటులో ఉంది. అదనపు ఫలితాలు అందుబాటులోకి వచ్చినప్పుడు నవీకరిస్తారు. 

ఇంధన సరఫరా గొలుసు అంతటా నాణ్యత పర్యవేక్షణ కొనసాగుతుందని, గుర్తించిన ఏవైనా వ్యత్యాసాలపై తక్షణ దిద్దుబాటు చర్యలు తీసుకుంటామని ఆయిల్ మార్కెటింగ్ కంపెనీలు తెలిపాయి. తమ నెట్‌వర్క్ ద్వారా సరఫరా చేయబడే ఈ20 పెట్రోల్ నిర్దేశిత నాణ్యతా ప్రమాణాలకు అనుగుణంగా ఉందని, వినియోగదారులు ఈ ఇంధనాన్ని నిశ్చింతగా వాడటం కొనసాగించవచ్చని ఆ కంపెనీలు భరోసా ఇచ్చాయి.