మాజీ నాబార్డ్ ఛైర్మన్ పామిడి కోటయ్య కన్నుమూత

పామిడి కోటయ్య ఆంధ్ర విశ్వవిద్యాలయంలో ఆర్థిక శాస్త్రంలో గోల్డ్ మెడలిస్ట్ గా నిలిచారు. అనంతరం భారతీయ రిజర్వు బ్యాంకు (ఆర్‌బీఐ)లో తన వృత్తి జీవితాన్ని ప్రారంభించారు. తర్వాత నాబార్డ్‌లో చేరి వివిధ కీలక బాధ్యతలు నిర్వహించారు. మేనేజింగ్ డైరెక్టర్‌గా, అనంతరం ఎగ్జిక్యూటివ్ ఛైర్మన్‌గా సంస్థకు నాయకత్వం వహించారు. ఆయన పదవీకాలంలో నాబార్డ్ గ్రామీణ రుణాలు, వ్యవసాయ పరపతి, గ్రామీణ మౌలిక సదుపాయాల అభివృద్ధిలో మరింత కీలక పాత్ర పోషించింది.

వ్యవసాయం, పాడి పరిశ్రమ, అనుబంధ రంగాలు, గ్రామీణ మౌలిక సదుపాయాల అభివృద్ధికి కోటయ్య విశేషంగా కృషి చేశారు. ముఖ్యంగా ఉమ్మడి ఆంధ్రప్రదేశ్‌లో వ్యవసాయ రంగం, సహకార సంస్థలు, గ్రామీణ బ్యాంకింగ్ వ్యవస్థ బలోపేతానికి ఆయన తీసుకున్న నిర్ణయాలు ఎంతో ఉపయోగపడ్డాయని వ్యవసాయ రంగ నిపుణులు పేర్కొంటున్నారు.

గ్రామీణ ప్రాంతాల్లో సంస్థాగత రుణాల విస్తరణ, చిన్న, సన్నకారు రైతులకు పరపతి అందుబాటులోకి తేవడం, గ్రామీణ మౌలిక సదుపాయాల అభివృద్ధి వంటి అంశాలపై ఆయన ప్రత్యేక దృష్టి సారించారు. దేశీయ బ్యాంకింగ్, వ్యవసాయ ఆర్థిక రంగంలో విశేష అనుభవం సంపాదించిన కోటయ్య సేవలను అంతర్జాతీయ సంస్థలు కూడా వినియోగించుకున్నాయి.

ప్రపంచ బ్యాంకు, ఐక్యరాజ్యసమితి ఆహార, వ్యవసాయ సంస్థ (ఎఫ్ఏఓ), అంతర్జాతీయ వ్యవసాయ అభివృద్ధి నిధి (ఐఎఫ్ఏడి), ఐక్యరాజ్యసమితి అభివృద్ధి కార్యక్రమం (యుఎన్ డిపి) వంటి సంస్థలకు సలహాదారుగా పనిచేశారు. వ్యవసాయ ఆర్థిక విధానాలు, గ్రామీణ అభివృద్ధి, అభివృద్ధి ఆర్థిక వ్యవస్థలపై ఆయన అందించిన సూచనలు అంతర్జాతీయ స్థాయిలో గుర్తింపు పొందాయి.

బ్యాంకింగ్, వ్యవసాయ పరపతి, గ్రామీణాభివృద్ధి రంగాల్లో ఆయన చేసిన సేవలకు అనేక జాతీయ, అంతర్జాతీయ పురస్కారాలు లభించాయి. ముఖ్యంగా చిన్న, మధ్య తరహా పరిశ్రమలు, గ్రామీణ ఆర్థికాభివృద్ధికి చేసిన కృషికి అంతర్జాతీయ స్థాయిలో ప్రశంసలు అందుకున్నారు.

రైతు కుటుంబం నుంచి వచ్చిన కోటయ్యకు వ్యవసాయ రంగ సమస్యలపై ప్రత్యక్ష అవగాహన ఉండేది. అందుకే రైతుల అవసరాలకు అనుగుణంగా రుణ విధానాలు, పాడి పరిశ్రమ, గ్రామీణ మౌలిక సదుపాయాల అభివృద్ధిపై ప్రత్యేక శ్రద్ధ చూపారు. ఆయన సేవల వల్ల ఉమ్మడి ఆంధ్రప్రదేశ్ వ్యవసాయ, గ్రామీణాభివృద్ధి రంగాలు గణనీయంగా లబ్ధి పొందాయని సహచరులు గుర్తుచేసుకుంటున్నారు.