ఢిల్లీలోని జంతర్ మంతర్ వద్ద జరుగుతున్న నిరసనల మధ్య, సిపిజే నిరసనను బయటి సామాజిక వ్యతిరేక శక్తులు పూర్తిగా తమ ఆధీనంలోకి తీసుకున్నాయని ఢిల్లీ పోలీసు వర్గాలు గురువారం పేర్కొన్నాయి. విద్యార్థుల ముసుగులో సామాజిక వ్యతిరేక శక్తులు గుంపులో కలిసిపోయి, అకస్మాత్తుగా యూనిఫాం ధరించిన సిబ్బందిపై పదునైన రాళ్లు, సీసాలతో దాడులు చేస్తున్నాయని, దాంతో మొత్తం గుంపు ఉద్రిక్తంగా మారుతోందని పోలీసులు తెలిపారు.
గుంపును అదుపు చేయడానికి ఢిల్లీ పోలీసులు ఆ ప్రాంతంలో అదనపు పారామిలిటరీ బలగాలను మోహరించారు. కఠిన చర్యలు తీసుకోవాలని ప్రభుత్వం ఇంకా ఆదేశాలు జారీ చేయలేదని, విద్యార్థులతో చర్చలు జరిపే మార్గాన్ని అన్వేషించాలని భావిస్తోందని ఢిల్లీ పోలీసులు తెలిపారు. అందుకే, బలగాలు ఎదురుదాడికి దిగకుండా తమ ప్రాణాలను కాపాడుకోవడంపై దృష్టి సారిస్తూ అత్యంత సంయమనం పాటిస్తున్నాయని వారు పేర్కొన్నారు.
ప్రస్తుతం ఉదయం వేళ జంతర్ మంతర్ వద్ద ప్రశాంతత నెలకొంది. అక్కడ సగం మేర జనం ఉన్నారు. పగటిపూట ప్రజలు నిరసనలో పాల్గొనడానికి వస్తుంటారు. కవితలు చదవడం, నినాదాలు చేయడం వంటివి చేస్తుంటారు. అదే సమయంలో ఇది శాంతియుత నిరసన అని వేదికపై నుండి ప్రకటనలు చేస్తూ నొక్కి చెబుతుంటారు. అయితే, సాయంత్రం అయ్యేకొద్దీ జనం సంఖ్య పెరుగుతుంది. భిన్నమైన నిరసన మొదలవుతుంది. అందులో పోలీసులను లక్ష్యంగా చేసుకోవడం, రాళ్లు రువ్వడంతో హింస చోటుచేసుకుంటాయి. గుంపు జంతర్ మంతర్ నుండి బయటకు వచ్చి వీధుల్లోకి విస్తరిస్తుంది.
రాళ్ల దాడిలో ఇద్దరు ఏసీపీలు, నలుగురు సిబ్బందికి గాయాలు
బుధవారం సాయంత్రం జంతర్ మంతర్ సమీపంలో నిరసనకారులు జరిపిన రాళ్ల దాడిలో కనీసం ఇద్దరు అసిస్టెంట్ కమిషనర్లు (ఎసిపిలు),నలుగురు సిబ్బంది గాయపడ్డారని పోలీసు వర్గాలు తెలిపాయి. నిరసన జరుగుతున్న ప్రదేశంలోకి అనేక “సామాజిక వ్యతిరేక” శక్తులు ప్రవేశించాయని వారు పేర్కొన్నారు. “వారు నిర్వాహకుల (సిజెపి) మాట కూడా వినడం లేదు. సిబ్బందిపై రాళ్లు రువ్వుతున్నారు” అని వారు తెలిపారు.
గాయపడిన సిబ్బందిని వెంటనే సమీపంలోని ఆసుపత్రికి తరలించారు. అక్కడ వారికి చికిత్స అందుతోంది. పోలీసు అధికారులందరి పరిస్థితి నిలకడగా ఉందని పోలీసు వర్గాలు తెలిపాయి. మొదటి సంఘటనలో, పంజాబీ బాగ్ పరిధిలో విధులు నిర్వర్తిస్తున్న ఏసీపీ జై ప్రకాష్కు సాయంత్రం 4:30 గంటల సమయంలో నుదుటిపై గాయమైంది. నిరసనకారులు రాళ్లు రువ్వినప్పుడు ఈ ఘటన జరిగిందని పోలీసుల ప్రకటన పేర్కొంది. శాంతిభద్రతలకు భంగం కలిగించవద్దని, శాంతిభద్రతలను కాపాడాలని పోలీసులు పదేపదే ప్రకటించారు.
ఇంటర్ నెట్ అవసరం లేని ప్రత్యేక యాప్ వాడక
జంతర్ మంతర్ వద్ద నిరసన కొనసాగుతుండగా, జూలై 20న సీజేపీ నిర్వహించిన ‘సంసద్ చలో’ మార్చ్ సందర్భంగా జరిగిన హింసాకాండపై ఢిల్లీ పోలీసులు జరిపిన దర్యాప్తులో, ఘర్షణల సమయంలో నిరసనకారులు సమన్వయం చేసుకోవడానికి ఒక ప్రత్యేక కమ్యూనికేషన్ యాప్ను ఉపయోగించినట్లు ఆరోపణలు వెలుగులోకి వచ్చాయి.
దర్యాప్తు సంస్థలు, భద్రతా దళాల కంట కూడా పడకుండా ఈ మెసేజింగ్ యాప్ను ఉపయోగించారు. అందిన సమాచారం ప్రకారం, ఈ అప్లికేషన్ బ్లూటూత్ టెక్నాలజీతో పనిచేస్తుంది. ఇంటర్నెట్ కనెక్షన్ లేకుండా కూడా వినియోగదారులు ఒకరితో ఒకరు సంభాషించుకోవడానికి వీలు కల్పిస్తుంది.
పార్లమెంట్ మార్చ్ సందర్భంగా భద్రతా సిబ్బందితో జరిగిన ఘర్షణల సమయంలో కొందరు నిరసనకారులు ఒకరితో ఒకరు సమన్వయం చేసుకోవడానికి ఈ బ్లూటూత్ ఆధారిత మెసేజింగ్ యాప్ను ఉపయోగించారని పోలీసులు అనుమానిస్తున్నారు. పోలీసులు యాప్ వినియోగాన్ని పరిశీలిస్తున్నారు. దర్యాప్తులో భాగంగా యాప్ డెవలపర్లు, సర్వీస్ ప్రొవైడర్ల నుండి వివరాలు కోరే అవకాశం ఉంది.
మార్చి 20న సీజేపీ నిర్వహించిన పార్లమెంట్ మార్చ్లో వేలాది మంది పాల్గొన్నారు. ఈ మార్చ్ తర్వాత హింసాత్మకంగా మారింది. ఈ ఘటనలో 100 మందికి పైగా పోలీసు సిబ్బంది గాయపడినట్లు సమాచారం. ఘర్షణల అనంతరం, ఢిల్లీ పోలీసులు పలు ఎఫ్ఐఆర్లు నమోదు చేసి, ఇందులో పాల్గొన్న వారిని గుర్తించేందుకు దర్యాప్తు ప్రారంభించారు.
నిరసన సమయంలో అల్లరిమూకలు ఒకరితో ఒకరు సంభాషించుకోవడానికి ఉపయోగించిన పద్ధతులపై పోలీసుల దర్యాప్తు దృష్టి సారిస్తోంది. ఇప్పటివరకు జరిగిన దర్యాప్తులో వెల్లడైన విషయమేమిటంటే, గుంపును సమీకరించేందుకు వాట్సాప్ గ్రూపులను సృష్టించారు. కానీ హింసాకాండ సమయంలో ఇంటర్నెట్ అందుబాటులో లేనప్పుడు, వారు ఒకరితో ఒకరు సంభాషించుకోవడానికి బ్లూటూత్ యాప్లను ఉపయోగించారు.
హింసకు, మరియు తర్వాత జరిగిన పరిస్థితులపై పోలీసులు దర్యాప్తు చేస్తున్నారు. దీనికి అదనంగా, పోలీసుల వద్ద సుమారు 150 వైరల్ వీడియోలు కూడా ఉన్నాయి. హింసలో పాల్గొన్న వారిని గుర్తించడానికి ఈ వీడియోలను ఉపయోగిస్తున్నారు. ముఖ్యంగా, రాళ్లు విసిరిన వారిని, భద్రతా సిబ్బందిని దురుసుగా ప్రవర్తించిన సంఘ విద్రోహ శక్తులను గుర్తించడానికి వైరల్ వీడియోలను ఉపయోగిస్తున్నారు.
More Stories
పేపర్ లీక్ ను రాహుల్ గాంధీ రాజకీయం చేస్తున్నారు
రాజధాని నిరసనలను చక్కదిద్దెందుకు ప్రభుత్వ ప్రయత్నాలు ముమ్మరం
రామమందిర వ్యవహారాల పర్యవేక్షణకు ప్రత్యేక ధార్మిక కమిటీ