16 ఏళ్లలోపు పిల్లలకు సోషల్ మీడియాపై బ్రిటన్ నిషేధం

ఈ నిషేధాన్ని అమలు చేయడానికి అవసరమైన చట్టపరమైన అధికారాలు ఇప్పటికే సిద్ధంగా ఉన్నాయని బ్రిటన్ ప్రధాని వెల్లడించారు. వచ్చే ఏడాది వసంతకాలం నాటికి ఈ చట్టం అమల్లోకి వచ్చే అవకాశం ఉందని తెలిపారు. సోషల్ మీడియా పిల్లల ఆనందాన్ని దెబ్బతీస్తోందని స్టార్మర్ ఆందోళన వ్యక్తం చేశారు. ఆన్‌లైన్ వేధింపులు, బెదిరింపులు, దుర్వినియోగం పెరగడానికి సోషల్ మీడియా వేదికలు కారణమవుతున్నాయని పేర్కొన్నారు. 

అలాగే పిల్లల మానసిక ఆరోగ్యంపై కూడా ప్రతికూల ప్రభావం చూపే ప్రమాదకర కంటెంట్‌ను ఈ ప్లాట్‌ఫారమ్‌లు అందుబాటులోకి తెస్తున్నాయని పేర్కొన్నారు. వినియోగదారులను ఎక్కువసేపు యాప్‌లలోనే ఉంచేందుకు రూపొందించిన అంతులేని స్క్రోలింగ్ వంటి ఫీచర్లు పిల్లలను వ్యసనానికి గురిచేస్తున్నాయని విమర్శించారు. 

సోషల్ మీడియా వినియోగం వల్ల పిల్లలు చదువుపై దృష్టి కోల్పోతున్నారని పేర్కొన్నారు. పుస్తకాలు చదవడం, బయట స్నేహితులతో ఆడుకోవడం, సమయానికి నిద్రపోవడం వంటి ఆరోగ్యకరమైన అలవాట్లు తగ్గిపోతున్నాయని చెప్పారు. సాంకేతికత పిల్లల జీవితంలో కీలక పాత్ర పోషిస్తున్నప్పటికీ, అది వారి అభివృద్ధికి ఆటంకం కలిగించే స్థాయికి చేరకూడదని స్పష్టం చేశారు.

ప్రతిపాదిత నిషేధంలో అన్ని డిజిటల్ సేవలు ఉండవు. కుటుంబ సభ్యులు, స్నేహితులతో కమ్యూనికేషన్ కోసం ఉపయోగించే వాట్సాప్​ వంటి మెసేజింగ్ యాప్‌లకు మినహాయింపు ఇవ్వనున్నట్లు ప్రభుత్వం వెల్లడించింది. అయితే గేమింగ్ సేవలు, లైవ్ స్ట్రీమింగ్ వేదికలు, అపరిచిత వ్యక్తులు పిల్లలతో నేరుగా సంప్రదించగలిగే ప్లాట్‌ఫారమ్‌లపై కఠిన పరిమితులు విధించనున్నారు. ఇందుకోసం ప్రత్యేక వయో నిర్ధారణ వ్యవస్థను రూపొందించే పనులు జరుగుతున్నాయి.