కర్ణాటకలోని ప్రముఖ పుణ్యక్షేత్రం ధర్మస్థల ఆలయం వివాదంలో కీలకంగా ఉన్న చిన్నయ్య అనే వ్యక్తి హైకోర్టులో దాఖలు చేసిన రిట్ పిటిషన్‌లో ప్రముఖ నటుడు ప్రకాష్ రాజ్ పేరు ఉందని వార్తలు వస్తున్న నేపథ్యంలో ఆయనను కర్ణాటక ప్రభుత్వం వెంటనే అరెస్ట్ చేయాలని బీజేపీ జాతీయ మండలి సభ్యుడు  విష్ణువర్ధన్ రెడ్డి డిమాండ్ చేశారు. ఈ కుట్రలో ప్రకాష్ రాజ్ భాగస్వామ్యం కావటం సిగ్గుచేటని మండిపడ్డారు. 

“జస్ట్ ఆస్కింగ్ పేరుతో అందరినీ ప్రశ్నించే నువ్వు ఇంత పెద్ద కుట్రకోణంలో ఏ రకంగా ఇరుక్కున్నావ్? ఆ కుట్రకోణానికి బాధ్యులైన చిన్నయ్యతో మాట్లాడాల్సిన అవసరం మీకేంటి? కర్ణాటక పోలీసులు మీ కోసం ప్రయత్నిస్తుంటే ఎక్కడికి పారిపోయారు? ప్రజాస్వామ్యం మీద నీకు విశ్వాసం ఉంటే తక్షణం బయటకు రావాలి” అని విష్ణువర్ధన్ రెడ్డి డిమాండ్ చేశారు.

“కర్ణాటకలోని కాంగ్రెస్ ప్రభుత్వం, డీకే శివకుమార్ ప్రకాష్ రాజ్‌ను ఎందుకు అరెస్ట్ చేయటం లేదు? అన్ని విషయాలలో తలదూర్చే ప్రకాష్ రాజ్ హిందువుల మీద, హిందూసంస్థల మీద, దేవాలయాల మీద ఇంత కుట్ర చేయాల్సిన అవసరం ఏంటి? ఆయన వెనుక ఉన్న పాత్రధారులు, సూత్రధారులెవరు?” అంటూ విస్మయం వ్యక్తం చేశారు.