బెంగాల్ లో 91 శాతం, తమిళ్ నాడులో 84 శాతం భారీగా పోలింగ్

తమిళనాడు అసెంబ్లీ ఎన్నికలు, పశ్చిమ బెంగాల్ అసెంబ్లీ ఎన్నికల మొదటి దశ పోలింగ్ గురువారం సాయంత్రం 7 గంటలకు ముగిసింది; ఈ ఎన్నికల్లో ఓటర్ల పోలింగ్ శాతం అత్యంత భారీగా నమోదైంది. పశ్చిమ బెంగాల్‌లో మొదటి దశ పోలింగ్‌లో మొత్తం 91.35 శాతం ఓటింగ్ నమోదవ్వగా, ఏప్రిల్ 23న ఒకే దశలో పోలింగ్ జరిగిన తమిళనాడులో 84.29 శాతం ఓటింగ్ నమోదైంది. ఈ రెండు రాష్ట్రాలతో పాటు అస్సాం, కేరళ, పుదుచ్చేరి రాష్ట్రాల ఓట్ల లెక్కింపు మే 4వ తేదీన జరగనుంది.

పశ్చిమ బెంగాల్‌లో ముఖ్యమంత్రి మమతా బెనర్జీ, ఆమె ప్రభుత్వ భవిష్యత్తును నిర్ణయించే అత్యంత కీలకమైన అసెంబ్లీ ఎన్నికల పోలింగ్, గురువారం జరుగుతోంది. రాష్ట్రంలో పోలింగ్ రెండు దశల్లో నిర్వహించబడుతోంది.  ఇందులో భాగంగా ఉత్తర బెంగాల్‌లోని ఎనిమిది జిల్లాల్లోని మొత్తం 54 నియోజకవర్గాలతో పాటు ముర్షిదాబాద్, నాడియా, బీర్‌భూమ్ మరియు హుగ్లీ జిల్లాల్లోని పలు నియోజకవర్గాలతో కలిపి మొత్తం 152 అసెంబ్లీ నియోజకవర్గాల్లో గురువారం మొదటి దశ పోలింగ్ జరుగుతోంది. 

రాష్ట్రంలో అత్యంత తీవ్రమైన రాజకీయ ధృవీకరణ నడుమ ఎన్నికలు జరుగుతుండగా, ముర్షిదాబాద్, దక్షిణ దినాజ్‌పూర్ జిల్లాల్లో అక్కడక్కడా హింసాత్మక ఘటనలు చోటుచేసుకున్నట్లు వార్తలు వచ్చాయి.  బెంగాల్ తొలిదశ పోలింగ్ సరళి ప్రకారం, తమ పార్టీ విజయం ఖాయమని టీఎంసీ అధినేత్రి మమతా బెనర్జీ ధీమా వ్యక్తం చేశారు. అసెంబ్లీ ఎన్నికల తర్వాత ప్రతిపక్షాలను కలుపుకొని కేంద్రంలో బీజేపీ ప్రభుత్వాన్ని గద్దె దించనున్నట్లు చెప్పారు.

ఎన్నికల సంఘం మొదటి దశ పోలింగ్‌ను విజయవంతంగా, ప్రశాంతంగా నిర్వహించిందని బీజేపీ నాయకుడు సువేందు అధికారి కొనియాడారు. తన అంచనా ప్రకారం ఓటింగ్ శాతం సుమారు 90 శాతంగా నమోదైందని ఆయన తెలిపారు. ఈ మొదటి దశలో బీజేపీ 125 స్థానాలను గెలుచుకుంటుందని ఆయన ధీమా వ్యక్తం చేశారు. ముస్లిం ఓట్లు ఇప్పటికే ఏకమయ్యాయని, అయితే ఫలితాలు వెలువడిన తర్వాత “85 శాతం మంది హిందువులు బీజేపీకి మద్దతు ఇస్తున్నట్లు కనిపిస్తారని” అధికారి వ్యాఖ్యానించారు. వామపక్ష ఓటర్లలో ఒక వర్గం బీజేపీ వైపు మొగ్గు చూపారని కూడా ఆయన తెలిపారు. 

తమిళనాడులో సాయంత్రం 5 గంటల వరకు 82.24 శాతం పోలింగ్ నమోదైందని ఎన్నికల సంఘం ప్రకటించింది.  ఈ ఎన్నికలలో అనుభవజ్ఞులైన రాజకీయ నాయకులు, కొత్తగా రంగంలోకి దిగిన వారి సమ్మేళనం కనిపిస్తుంది.  దీంతో ఇది అందరి దృష్టినీ ఆకర్షించే ఒక హోరాహోరీ పోరుగా మారింది. అధికారాన్ని నిలబెట్టుకునే ప్రయత్నంలో, ముఖ్యమంత్రి ఎం.కె. స్టాలిన్ డీఎంకే నేతృత్వంలోని కూటమికి నాయకత్వం వహిస్తుండగా, ఏఐఎడిఎంకె అధినేత ఎడప్పాడి కె. పళనిస్వామి ప్రతిపక్ష ప్రచారానికి సారథ్యం వహిస్తున్నారు. 

పార్టీ తదుపరి తరం నాయకత్వంలో ఉదయనిధి స్టాలిన్ ఒక కీలక ముఖంగా ఎదిగారు. అలాగే నటుడి నుండి రాజకీయ నాయకుడిగా మారిన విజయ్ తన మొదటి ఎన్నికల బరిలో నిలిచారు. పోలింగ్ కేంద్రాల వద్ద రద్దీ నేపథ్యంలో ఓటింగ్‌ను మరో రెండు గంటల పాటు పొడిగించాలని ఎన్నికల సంఘానికి విజయ్ లేఖ రాశారు. అలాగే బస్​ టర్మినల్​లో చిక్కుకోపోయిన వారికోసం ప్రజా రవాణాను ఏర్పాటు చేయాలని కోరారు.