ఢిల్లీ ఎర్రకోట వద్ద భారీ పేలుడు.. అప్రమత్తమైన యూకే, యూఎస్

ఈ ఘటనపై యూకే, యూఎస్ వెంటనే స్పందించాయి. రెండు దేశాలు అప్రమత్తమై.. తమ దేశ పౌరులకు కీలక హెచ్చరికలు జారీ చేశాయి. పేలుడు జరిగిన కారు యజమాని హర్యానాకు చెందిన నదీమ్‌ఖాన్‌ ను పోలీసులు అదుపులోకి తీసుకున్నారు. పేలుడు జరిగిన సమయంలో కారులో ముగ్గురు ఉన్నట్లు గుర్తించారు.
పేలుడు ధాటికి 10 వాహనాలు పూర్తిగా ధ్వంసమయ్యాయని తెలిపారు. ఎర్రకోట సమీపంలోని పార్కింగ్ స్థలంలో మూడు గంటల పాటు ఐ20 కారు నిలిపి ఉంచారని వివరించారు.

ఈ కారు నిన్న మధ్యాహ్నం 3:19 గంటలకు పార్కింగ్ స్థలంలోకి వచ్చినట్లు గుర్తించారు. ఐ20 కారు నిన్న సాయంత్రం 6:48 గంటలకు పార్కింగ్ స్థలం నుంచి బయలుదేరిందని తెలిపారు. ఆ తర్వాత కాసేపటికే పేలుడు సంభవించిందని పేర్కొన్నారు కేంద్ర ఇంటెలిజెన్స్ అధికారులు.

ఢిల్లీ- హరియాణా సరిహద్దు సమీపంలో వాహనాలు, లాడ్జీలను తనిఖీ చేస్తున్నారు. ముఖ్యంగా సింఘు, టిక్రీ, బదర్‌పుర్‌ సరిహద్దుల వద్ద అదనపు పికెట్‌లను ఏర్పాటు చేసి గస్తీని ముమ్మరం చేశారు. అయితే ప్రతి సోమవారం దిల్లీలోని పర్యాటక ప్రదేశాలు, మార్కెట్లకు సెలవు. అందువల్ల ప్రమాదం తీవ్రత, ప్రాణ నష్టం కాస్త తగ్గిందని తెలుస్తోంది.ఢిల్లీ పేలుడు ఘటనతో కేంద్రం హైదరాబాద్ తో సహా పలు నగరాల్లో హై అలర్ట్ ప్రకటించింది.

దీనితో హైదరాబాద్ పోలీసులు అప్రమత్తమై పాతబస్తీలో ముమ్మరంగా గాలింపు చర్యలు చేపడుతున్నారు. మరోవైపు ఉత్తరప్రదేశ్లోని అన్ని మతపరమైన ప్రదేశాలు, సరిహద్దు ప్రాంతాల్లోనూ భద్రత పెంచాలని ఆదేశాలు జారీ చేసినట్లు ఆ రాష్ట్ర డీజీపీ తెలిపారు. సున్నితమైన ప్రాంతాల్లో గస్తీ, తనిఖీలు పెంచాలని ఉన్నతాధికారులు ఉత్తర్వులు జారీ చేశారు.

దేశంలో భారీ ఉగ్రకుట్రలు భగ్నమవుతున్న వేళ ఈ పరిణామం చోటుచేసుకుంది. ఈ ఘటనతో ఢిల్లీతో పాటు ఉత్తర్ప్రదేశ్లోని లఖ్నవూతో పాటు, ముంబయి, హైదరాబాద్‌ సహా ఇతర నగరాల్లో ఆయా రాష్ట్రాల పోలీసులు హై అలెర్ట్ ప్రకటించారు. హరియాణాలోని ఫరీదాబాద్లో మూడు వేల కిలోల పేలుడు తయారీ పదార్థాలను జమ్మూకశ్మీర్ పోలీసులు స్వాధీనం చేసుకున్న వేళ, ఈ ఘటన జరగడం అనుమానాలకు తావిస్తోంది.

అమెరికా స్టేట్ డిపార్ట్‌మెంట్ ప్రతినిధి మీడియాతో మాట్లాడుతూ.. ఢిల్లీలోని పేలుడు పరిస్థితిని నిశితంగా గమనిస్తున్నట్లు తెలిపారు. అవసరమైతే తమ పౌరులకు కాన్సులర్ సహాయం అందించడానికి సిద్ధంగా ఉన్నట్లు ప్రకటించారు. అలాగే తమ దేశం నుంచి పౌరులు ఎవరూ ఇప్పుడు ఢిల్లీకి వెళ్లకూడదని సూచించారు. మరోవైపు యునైటెడ్ కింగ్‌డమ్ కూడా వెంటనే అప్రమత్తమై తమ ప్రయాణికులకు ప్రయాణ హెచ్చరిక జారీ చేసింది. తమ పౌరులు అప్రమత్తంగా ఉండాలని, భారత దేశంలోని కొన్ని ప్రాంతాలకు ప్రయాణాలను తాత్కాలికంగా విరమించుకోవాలని సూచించింది.