అన్నమయ్య జిల్లా రాయచోటిలో ఉగ్ర మూలాల కదలికలపై పోలీసు దర్యాప్తు కొనసాగుతోంది. అబూబకర్ సిద్ధికి, మహమ్మద్ అలీ ఇళ్ల వద్ద పోలీసులు భారీగా మోహరించారు. అబూబకర్‌ సిద్ధికి ఇంట్లో ఢిల్లీ చిరునామాతో సిద్దంచేసిన పార్శిల్‌ బాంబును స్వాధీనం చేసుకున్నారు. మందుగుండు సామగ్రి, పాస్‌పోర్టులు, బ్యాంకు పాస్‌ పుస్తకాలు, ఇతర ఎలక్ట్రానిక్‌ పరికరాలు స్వాధీనం చేసుకున్నారు. 

ఉగ్రవాదులకు ఇతర దేశాలతో సంబంధాలున్నాయా? అనే కోణంలో పోలీసులు ఆరా తీస్తున్నారు. వారి ఇళ్ల వద్ద బందోబస్తు ఏర్పాటు చేశారు. కొందరు అనుమానితులను జిల్లా పోలీసు అధికారులు ప్రశ్నించారు.  అలాగే అనుమానితులు ఎవరూ ఆ ప్రాంతానికి రాకుండా జాగ్రత్తలు తీసుకున్నారు. ఉగ్రవాదులతో పరిచయాలు ఉన్న వారిని పోలీసులు రహస్యంగా ప్రశ్నిస్తున్నారు. 

వారి పాస్ పోర్టులు, బ్యాంకు పుస్తకాల పైన ఆరా తీస్తున్నారు. వారికి ఆర్థిక మూలాలు ఎక్కడి నుంచి వస్తున్నాయి? అనే దానిపైన పోలీస్ శాఖ నిఘా పెట్టింది. మరోసారి ఉగ్రవాదుల ఇళ్లలో పోలీసులు సోదాలు చేసినట్లు సమాచారం. ఇప్పటికే ఈ కేసులో ఉగ్రవాదుల భార్యలను పోలీసులు అరెస్ట్ చేసి రిమాండ్కు తరలించారు. వారితో సంబంధాలు ఉన్న వారి పైన పోలీసులు ప్రశ్నిస్తున్నట్లు తెలిసింది.

ఇటీవల రాయచోటిలో ఉగ్రవాదులు అబూబకర్‌ సిద్ధిఖీ, మహ్మద్‌ అలీని ఐబీ పోలీసులు అరెస్ట్‌ చేసిన విషయం తెలిసిందే. ఈ నేపథ్యంలో విచారణ చేపట్టిన స్థానిక పోలీసులు నిందితుల కుటుంబసభ్యులపై కూడా కేసులు నమోదు చేశారు. అబూబకర్‌ సిద్ధిఖీ భార్య షేక్‌ సైరాభాను, మహ్మద్‌ అలీ భార్య షేక్‌ షమీమ్‌పై కేసు నమోదు చేసి కోర్టులో హాజరుపరిచారు. న్యాయస్థానం 14 రోజుల రిమాండ్‌ విధించింది. దీంతో వారిని కడప కేంద్ర కారాగారానికి తరలించారు.

అబూబకర్ సిద్ధికి, మహమ్మద్ అలీ అనే ఇద్దరు ఉగ్రవాదులు 30 ఏళ్ల నుంచి అన్నమయ్య జిల్లా కేంద్రం రాయచోటిలో ఉన్నారన్న సమాచారంతో ఆ ప్రాంతం ఒక్కసారిగా ఉలిక్కిపడింది. రాయచోటిలోని కొత్తపల్లి ప్రాంతంలో ఇళ్లు అద్దెకు తీసుకుని చీరల వ్యాపారం చేసుకుంటున్న సోదరులు అబూబకర్ సిద్ధిఖీ, మహ్మద్ అలీ తెరవెనక భారీ బాంబు పేలుళ్లకు కుట్ర పన్నినట్లు ఇంటెలిజెన్స్‌ బ్యూరో గుర్తించింది.