ప్రధాని సలహా మండలి ఛైర్మన్‌గా మహేంద్రదేవ్‌

సూర్యదేవర మహేంద్రదేవ్‌ తండ్రి డాక్టర్‌ సంజీవ్‌దేవ్‌ అద్భుత అంతర్జాతీయ చిత్రకారులు, సాహితీవేత్త, రచయిత. ఇంగ్లాండ్‌లోని మ్యూజియంలో సైతం సంజీవ్​దేవ్ చిత్రాలు నేటికీ ఉంటాయి. అటువంటి మూలాలున్న కుటుంబం నుంచి ఎదిగిన సూర్యదేవర మహేంద్రదేవ్‌ దాదాపు అదే స్థాయికి ఎదిగారు. ఎయిడెడ్‌ స్కూల్​లో చదివిన స్థాయి నుంచి పట్టణాలు, నగరాలు దాటి మహేంద్రదేవ్​ విద్యా ప్రయాణం సాగింది. 

ఒక్క ఆహార ఖర్చు మాత్రమే తీసుకుని పేదరికాన్ని లెక్కించడం మాత్రమే కాకుండా నిత్యావసరాలైన మొబైల్‌ ఛార్జీలు, విద్య, వైద్యం వంటి ఖర్చులు సైతం అంచనా వేసి పేదరికాన్ని లెక్కించాలని అప్పటి కమిటీ ఛైర్మన్‌కు తేల్చి చెప్పిన వ్యక్తి సూర్యదేవర మహేంద్రదేవ్‌. అప్పట్లో మహేంద్రదేవ్​  పేదరికం అంచనా వేసే కమిటీలో సభ్యుడిగా ఉన్నారు.

తుమ్మపూడికి వచ్చినప్పుడల్లా తన తండ్రి సమాధి ఉన్న నిమ్మ చేలో కొంత సేపు సేదదీరడం, అక్కడ ఉండే అరుగులపై కూర్చుని నలుగురితో మాట్లాడడం అంటే మహేంద్రదేవ్​కి ఎంతో ఇష్టం. పల్లెటూళ్లలో అందులోనూ సొంత ఊరులో ఇలా చెట్ల మధ్య అందరితో కూర్చుని మాట్లాడుతుంటే ఆ తీరే వేరని మహేంద్రదేవ్​ అంటారు. మా ఊరి వ్యక్తి ప్రధానమంత్రికి ఉండే ప్రధాన మంత్రి సలహా మండలికి ఛైర్మన్‌ అయ్యారంటే అది తుమ్మపూడికి గర్వకారణం అని మాజీ సర్పంచి నర్రా శ్రీనివాసరావు సంతోషం వ్యక్తంచేశారు. చిన్ననాటి నుంచి ఆయన కష్టపడి చదివారని, అందుకే ఆ స్థాయికి ఎదిగారని పేర్కొన్నారు. నేటి యువతకు సూర్యదేవర మహేంద్రదేవ్‌ స్ఫూర్తి అని కొనియాడారు.