వైసీపీకి ధీటుగా రుణాలు తీసుకొంటున్న చంద్రబాబు ప్రభుత్వం

ఈ ఆర్థిక సంవత్సరం ఏడు నెలల కాలంలో రూ. 48,000 కోట్లను ఆంధ్ర ప్రదేశ్ ప్రభుత్వం రుణంగా తీసుకుంది. రిజర్వ్‌బ్యాంకు నిర్వహించే సెక్యూరిటీల వేలం ద్వారా ఈ రుణాలను తీసుకున్నారు. ఈ మొత్తం రుణాల్లో ఏప్రిల్‌ నుంచి జూన్‌ మధ్య కాలం వరకు గత ప్రభుత్వ హయాంలో రూ. 23,000 కోట్లు సేకరించగా, తర్వాత వచ్చిన తెలుగుదేశం ప్రభుత్వం రూ. 25 వేల కోట్లు రుణంగా తీసుకుంది.

ప్రతి నెలా శుక్రవారాల్లో రిజర్వ్‌బ్యాంకు సెక్యూరిటీల వేలం ద్వారా రుణాలు అందిస్తుంది. మంగళవారం అన్ని రాష్ట్రాల నుంచి ఇండెంట్లు ఆహ్వానించడం, వాటిపై శుక్రవారం రుణాలు అందించడం జరుగుతుంది. ఇందులో భాగంగానే మొత్తం ఏడు నెలల్లో రూ. 48 వేల కోట్ల వరకు తనఖాల ద్వారా రుణాలు తీసుకున్నారు.  ఈ ఏడు నెలల కాలంలో కేవలం ఆరు శుక్రవారాలు మాత్రమే రుణాలకు రాష్ట్ర ప్రభుత్వం దూరంగా ఉండగా, మిగిలిన అన్ని వారాల్లోనూ సెక్యూరిటీలు తనఖా పెట్టడం గమనార్హం.

ఏప్రిల్‌, జూలై, ఆగస్టు, సెప్టెరబర్‌ నెలల్లో ఒక్కో శుక్రవారం రుణాలకు వెళ్లకపోగా, అక్టోబర్‌లో రెండు సార్లు రుణాలకు దూరంగా ప్రభుత్వం ఉంది.  అలాగే మే నెల్లో అత్యధికంగా రూ. 15 వేల కోట్లు రుణాలుగా తీసుకోగా, అత్యల్పంగా సెప్టెంబర్‌, అక్టోబర్‌ మాసాల్లో మూడేసి వేల కోట్ల చొప్పున రుణ సేకరణ నిర్వహించారు. అలాగే మొత్తం రూ. 48 వేల కోట్ల రుణాన్ని 50 విడివిడి రుణ దరఖాస్తులతో తీసుకున్నారు.

అలాగే గత ప్రభుత్వ హయాంలో 74 రోజుల్లో ఎనిమిది పర్యాయాలు రూ. 23 వేల కోట్లు సేకరించగా, కొత్త ప్రభుత్వం ఏర్పడిన తరువాత 140 రోజుల్లో మరో ఎనిమిది సార్లు రుణాలు తీసుకున్నారు. ఏప్రిల్‌ నుంచి అక్టోబర్‌ వరకు నెలవారీగా తీసుకున్న రుణాలు (రూ. కోట్లలో) నెల రుణం: ఏప్రిల్‌ 6,000, మే 15,000, జూన్‌ 9,000, జూలై 5,000, ఆగస్టు 7,000, సెప్టెంబర్  3,000, అక్టోబర్‌ 3,000, మొత్తం 48,000.