సరిహద్దుల వివాదంలో భారత్ – చైనా కీలక పురోగతి

తూర్పు ల‌డాఖ్‌ లోని వాస్త‌వాదీన రేఖ వ‌ద్ద పెట్రోలింగ్ నిర్వ‌హించే అంశంలో భార‌తీయ‌, చైనా అధికారుల మ‌ధ్య జ‌రిగిన చ‌ర్చ‌లు స‌ఫ‌ల‌మైన‌ట్లు తెలుస్తోంది. సరిహద్దు సమస్యపై గత కొన్నేళ్లుగా కొనసాగుతున్న ప్రతిష్టంభన, దీనిపై ఇరుదేశాల మధ్య జరుగుతున్న చర్చల్లో కీలక పురోగతి కనిపించింది. భారత్ – చైనాల మధ్య సరిహద్దు వివాదంలో కొత్త పురోగతి సాధించినట్లు విదేశాంగ మంత్రి ఎస్ జైశంకర్ నిర్ధారిస్తూ 2020కు ముందు పెట్రోలింగ్ చేస్తున్న ప్రాంతాలలో ఇక నుండి భారత సేనలు పెట్రోలింగ్ సాగిస్తాయని వెల్లడించారు.

పెట్రోలింగ్ అంశంలో ఓ ఒప్పందం కుదిరిన‌ట్లు విదేశాంగ కార్య‌ద‌ర్శి విక్ర‌మ్ మిశ్రి తెలిపారు. సోమవారం ఢిల్లీలో ఏర్పాటు చేసిన మీడియా సమావేశంలో ఆయన మాట్లాడుతూ, గత కొన్ని వారాలుగా దౌత్య, సైనిక స్థాయిలో భారతదేశం-చైనా మధ్య చర్చలు జరుగుతున్నాయని చెప్పారు. ఫలితంగా ఎల్ఓసీ వెంబడి పెట్రోలింగ్ ఏర్పాట్లపై ఒక అవగాహన కుదిరిందని తెలిపారు.  బలగాల ఉపసంహరణ, పరిస్థితిని చక్కదిద్దేందుకు పెట్రోలింగ్ ఏర్పాట్లు చేస్తామని చెప్పారు. దీప్‌సాంగ్‌, డెమ్‌చోక్ ప్రాంతాల్లో నిర్వ‌హించే పెట్రోలింగ్ అంశంలో ఒప్పందం కుదిరిన‌ట్లు తెలుస్తోంది.  ఇది 2020లో ఈ ప్రాంతాలలో తలెత్తిన సమస్యల పరిష్కారానికి దారి తీస్తోందని ఆయన ఆశాభావం వ్యక్తం చేశారు.