బాలీవుడ్ నటుడు గోవిందాకు బుల్లెట్ గాయం

బాలీవుడ్ సీనియర్ నటుడు, శివసేన నేత గోవిందాకు బుల్లెట్ గాయమైంది. ప్రమాదవశాత్తు ఆయన సొంత తుపాకీ పేలడం వల్ల కాలిలోకి బుల్లెట్ దూసుకెళ్లింది. కుటుంబ సభ్యులు వెంటనే ఆయనను ఆస్పత్రికి తరిలించారు. ఈ ప్రమాదం మంగళవారం తెల్లవారుజామున ముంబయిలోని గోవిందా నివాసంలోనే జరిగినట్లు పోలీసులు తెలిపారు. 

ప్రస్తుతం ఆయన ఆరోగ్యం నిలకడగానే ఉందని పేర్కొన్నారు. ఈ ఘటనపై ఎవరు ఫిర్యాదు చేయలేదని, దర్యాప్తును ప్రారంభించినట్లు పేర్కొన్నారు. మంగళవారం తెల్లవారుజామున 4:45 గంటలకు కోల్​కతా వెళ్లేందుకు సిద్ధమవుతుండగా ఈ ఘటన జరిగిందని గోవిందా మేనేజర్ శశి సిన్హా తెలిపారు. 

‘మేం కోల్​కతా వెళ్లేందుకు విమానం ఆరు గంటలకు ఉంది. నేను అప్పటికే విమానాశ్రయానికి చేరుకున్నా. ఆయన అక్కడకు వచ్చేందుకు సిద్ధమవుతుండగా ఈ ప్రమాదం జరిగింది. గోవిందా తన లైసెన్స్​డ్​ రివాల్వర్​ను తుపాకీ కేసులో పెట్టుకుంటుండగా చేతిలో నుంచి జారి కిందపడి మిస్​ ఫైర్ అయ్యింది’ అని తెలిపారు.

`బుల్లెట్ ఆయన కాలిలోకి దూసుకుపోయిందని, వెంటనే సమీపంలోని క్రిటీకేర్ ఆస్పత్రికి తీసుకెళ్లగా, వైద్యులు దానిని తొలగించినట్లు చెప్పారు. ఆయన ఆరోగ్యం బాగానే ఉంది. ప్రస్తుతం ఆస్పత్రిలో ఉన్నారు’ అని శశి సిన్హా తెలిపారు.  ఈ ఘటనపై గోవిందా స్పందించారు. ‘నా తల్లిదండ్రుల ఆశీర్వాదం, మీ అందరి ప్రేమ వల్లే నేను ఈ ప్రమాదం నుంచి బయటడ్డాను. వైద్యులు కాలులో ఉన్న బుల్లెట్​ను తొలగించారు’ అని గోవిందా చెప్పారు. 

వైద్యుడు డాక్టర్‌ రమేశ్‌ అగర్వాల్‌ మాట్లాడుతూ ఉదయం 5గంటల సమయంలో గోవింద ఆసుపత్రికి వచ్చారని, 6 గంటలకు ఆపరేషన్‌ థియేటర్‌కు తీసుకెళ్లామని, బుల్లెట్‌ను తొలగించేందుకు గంటన్నర సమయం పట్టిందని తెలిపారు. ఎముకలోకి బుల్లెట్‌ చొచ్చుకువెళ్లింని పేర్కొంటూ మూడు నెలల నుంచి నాలుగు నెలల పాటు గోవింద విశ్రాంతి తీసుకోవాల్సి ఉంటుందని చెప్పారు. కాలికి తీవ్ర గాయమైందని.. , దాంతో కాలుపై ఎక్కువగా బరువును మోపలేరని వివరించారు.

ఆస్పత్రిలో చికిత్స పొందుతున్న గోవిందాకు మహారాష్ట్ర ముఖ్యమంత్రి ఏక్​నాథ్​ శిందే ఫోన్ చేశారు. ఆయన ఆరోగ్య పరిస్థితిని అడిగి తెలుసుకున్నారు. గోవిందా వేగంగా కోలుకునేలా మెరుగైన చికిత్స అందించాలని ఆస్పత్రి వర్గాలకు ముఖ్యమంత్రి సూచించారు.

1963లో పుట్టిన గోవిందా దాదాపు 165పైగా చిత్రాల్లో నటించారు. లోక్​సభ ఎన్నికలకు ఒక నెల ముందు ఆయన ఏకనాథ్ శిందే నేతృత్వంలోని శివసేన పార్టీలో చేరారు. దాదాపు రెండు దశాబ్దాల తర్వాత గోవిందా రాజకీయాల్లోకి రీ ఎంట్రీ ఇచ్చారు. చివరిగా 2004లో కాంగ్రెస్ పార్టీ తరఫున నార్త్​ ముంబయి లోక్​సభ నియోజక వర్గం నుంచి పోటీ చేసి ఎంపీగా గెలిచారు.