హమాస్‌ చీఫ్‌ హనియే హత్య

ఖతార్‌లో నివసిస్తున్న ఇస్మాయిల్‌ హనియే ఇరాన్‌ నూతన అధ్యక్షుడు మసూద్‌ పెజెష్కియాన్‌ ప్రమాణ స్వీకార కార్యక్రమంలో పాల్గొనేందుకు టెహ్రాన్‌కు వెళ్లాడు. ఇరాన్ అధ్యక్షుడి ప్రమాణస్వీకారంకు హాజరైన కొద్దీ గంటల్లోనే బుధవారం తెల్లవారుజామున ఈ హత్య జరిగింది. ఈ విషయాన్నీ ఒక వంక ఇరాన్ రెవల్యూషనరీ గార్డ్, మరోవంక హమాస్ లు నిర్ధారించారు.

అయితే హనియేను ఎవరు హత్య చేశారు? ఎలా హత్య చేశారు? వివరాలను ఇరాన్‌ ఇంకా వెల్లడించలేదు. కానీ, హనియే హత్యపై దర్యాప్తు జరుగుతున్నదనే విషయాన్ని మాత్రం ప్రకటించింది. ఇదిలావుంటే ఇజ్రాయెల్‌, అమెరికా దేశాలు ఇంతవరకు హనియే హత్యపై స్పందించలేదు. పరిస్థితులను అంచనా వేస్తున్నామని మాత్రం ఇజ్రాయిల్ సైన్యం పేర్కొన్నది.

కాగా పాలస్తీనాలోని హమాస్‌ గ్రూప్‌కు, ఇజ్రాయెల్‌ సైన్యానికి మధ్య గత కొన్ని నెలలుగా యుద్ధం జరుగుతున్నది. ఈ నేపథ్యంలో ఇప్పుడు హమాస్‌ పొలిటికల్‌ బ్యూరో చీఫ్‌ హత్యకు గురికావడం ఆందోళనకరంగా మారింది. హమాస్‌, ఇజ్రాయెల్‌ మధ్య ఉద్రిక్తతలు మరింత పెరిగే అవకాశం ఉంది. కొన్ని నెలలుగా మారణహోమం కొనసాగుతుండటంతో హమాస్‌, ఇజ్రాయెల్‌ మధ్య కాల్పుల విరమణ ఒప్పందం చేయించేందుకు అమెరికా ప్రయత్నిస్తున్నది. ఈ క్రమంలో హమాస్‌ పొలిటికల్‌ బ్యూరో చీఫ్‌ హనియే హత్యకు గురికావడం పరిస్థితిని మరింత సంక్లిష్టంగా మార్చింది.