అంతకుముందు తొలుత బ్యాటింగ్ చేసిన సన్రైజర్స్ పూర్తి ఓవర్లు కూడా బ్యాటింగ్ చేయలేకపోయింది. 18.3 ఓవర్లలోనే 113 పరుగులకు ఆలౌట్ అయింది. ఐపీఎల్ ఫైనల్లో ఇప్పటివరకు ఇదే అత్యల్ప స్కోరు కావడం గమనార్హం. అంతకుముందు చెన్నై సూపర్ కింగ్స్ పేరిట ఈ చెత్త రికార్డు ఉంది. ఆ టీం 2013 ఫైనల్లో 125 రన్స్ చేసింది. ఇక ఐపీఎల్ మొత్తం మీద సన్‌రైజర్స్‌కు ఇది మూడో అత్యల్ప స్కోరు. 2019లో ముంబైపై 96, 2015లో అదే జట్టుపై 113 పరుగులు చేయగా.. ఇప్పుడు కూడా అంతే స్కోరు చేసింది.
తొలుత ఆండ్రూ ర‌స్సెల్(3/19), మిచెల్ స్టార్క్(2/4) బంతితో బెంబేలెత్తించారు. దాంతో ఐపీఎల్ ఫైన‌ల్లోనే అత్యల్ప స్కోర్‌కు హైద‌రాబాద్ ఆలౌట‌య్యింది. అనంతరం ఓపెనర్ రహ్మనుల్లా గుర్బాజ్(39), వెంకటేశ్ అయ్యర్(52 నాటౌట్)లు సుడిగాలి ఇన్నింగ్స్ ఆడారు. దాంతో, ఐపీఎల్ ఫైనల్ చ‌రిత్ర‌లోనే లో స్కోరింగ్ న‌మోదైన మ్యాచ్‌లో కోల్కతా జ‌య‌భేరి మోగించింది. గౌతం గంభీర్ కెప్టెన్సీలో 2012, 2014లో టైటిల్ గెలిచిన కోల్కతా ఇప్పుడు అత‌డు మెంటార్‌గా రాగానే చాంపియ‌న్‌గా నిల‌వ‌డం విశేషం.
ఐపీఎల్- 2024 మొత్తం అదరగొట్టిన కోల్కతా బౌలర్లు ఫైనల్లో అంతకుమించి చెలరేగడం విశేషం. ఏ దశలోనూ సన్‌రైజర్స్‌ను కోలుకోనివ్వలేదు. క్రమం తప్పకుండా వికెట్లు తీస్తూ రైజర్స్‌ను తక్కువ స్కోరుకే పరిమితం చేసింది. తొలి ఓవర్లోనే అభిషేక్ (2) వికెట్ తీసి శుభారంభం అందించాడు మిచెల్ స్టార్క్. మరుసటి ఓవర్లో ట్రావిస్ హెడ్‌ను (0) అద్భుత బంతితో పెవిలియన్ చేర్చాడు వైభవ్ అరోరా. క్వాలిఫయర్-1, 2 హీరో రాహుల్ త్రిపాఠి భారీ షాట్‌కు (9) ప్రయత్నించి స్టార్క్ బౌలింగ్‌లోనే అవుట్ అయ్యాడు.
ప‌దిహేడో సీజ‌న్‌లో ఎన్నో ఉత్కంఠ పోరాటాలు.. ఆఖ‌రి ఓవ‌ర్ థ్రిల్ల‌ర్ చూశాం. దాంతో, ఫైనల్ మ్యాచ్ అన‌గానే ప‌వ‌ర్ హిట్ట‌ర్ల విధ్వంసం ఆఖ‌రి ఓవ‌ర్ ఉత్కంఠ.. రికార్డు ఛేజింగ్ ఉంటాయ‌నుకున్న అభిమానుల‌కు నిరాశే మిగిలింది. చెపాక్ స్టేడియంలో కోల్కతా బౌలర్లు రికార్డు బ్రేక‌ర్ సన్రైజర్స్ జ‌ట్టును ఓ ఆట ఆడుకున్నారు. దాంతో, హైద‌రాబాద్ 113 ప‌రుగుల‌కే కుప్ప‌కూలింది.
ఈ ఐపీఎల్‌లో కోల్కతా ప్రధాన బలం వారి బౌలింగ్. బ్యాటింగ్‌లో అన్ని టీమ్స్ రాణించినా పేస్, స్పిన్ రెండింట్లోనూ ఆరంభం నుంచీ కేకేఆర్ సమతూకంగా కనిపించింది. అదే బలంతో టైటిల్ గెల్చింది. ఈ ఐపీఎల్‌లో మిడిల్ ఓవర్లలో (7-15) అత్యధిక వికెట్లు తీసిన వారిలో తొలి 3 స్థానాల్లో కోల్కతా బౌలర్లే ఉండటం విశేషం.
వరుణ్ చక్రవర్తి మిడిల్ ఓవర్లలోనే 17, సునీల్ నరైన్ (13), ఆండ్రీ రసెల్ (12) వికెట్లు తీశారు. సీజన్ మొత్తంలో కోల్కతా బౌలర్లు అద్భుత ప్రదర్శన చేశారు. చక్రవర్తి 14 మ్యాచ్‌ల్లో 21 వికెట్లు తీయగా.. హర్షిత్ రాణా (19), రసెల్ (19), నరైన్ (17), స్టార్క్ (17) వికెట్లు తీశారు. సన్రైజర్స్ నుంచి నటరాజన్ (19), కమిన్స్ (18) తప్ప ఎవరూ ఆకట్టుకోలేదు.
More Stories
పోలవరం పూర్తికి నాలుగేళ్లు పట్టే అవకాశం
ఎన్నికలు జరిగే రాష్ట్రాలకు బీజేపీ ఇన్‌ఛార్జ్‌లుగా కేంద్ర మంత్రులు
బెంగాల్లో రెండు రైళ్లు ఢీ.. 15 మంది మృతి