కాళేశ్వరంపై దర్యాప్తుకు సీబీఐ సిద్ధం

కాళేశ్వరంలో అవినీతిపై దర్యాప్తు చేయాలని ఫిర్యాదు చేసినా సీబీఐ నుంచి స్పందన లేదని పేర్కొంటూ న్యాయవాది రామ్మోహన్‌ రెడ్డి హైకోర్టులో పిటిషన్‌ వేశారు. దీనిపై సీబీఐ హైదరాబాద్‌ విభాగం హెడ్‌, ఐపీఎస్‌ అధికారి డీ కళ్యాణ్‌ చక్రవర్తి తన కౌంటర్‌ దాఖలు చేస్తూ ఈ వ్యవహారంపై రాష్ట్ర ప్రభుత్వం నుంచి ఇప్పటి వరకు తమకు ఎలాంటి సమాచారం లేదని, ఉత్తర ప్రత్యుత్తరాలు జరగలేదని హైకోర్టుకు తెలిపారు. 

కాళేశ్వరం ఎతిపోతల సాగునీటి పధకంలో అవినీతి అక్రమాలు జరిగాయన్న ఆరోపణలపైన నేరుగా కల్పించుకుని దర్యాప్తు చేయలేమని తెలిపారు. ఈ అంశంలో సిబిఐకి పరిమితులు ఉన్నట్టు తెలిపారు.  అంతే కాకుండా కాళేశ్వరం ప్రాజెక్టు నిర్మాణం కోసం అవరమైన రుణ సదుపాయం కల్పించి నిధులు అందజేసిన ఆర్ధిక సంస్థలనుంచిగాని, బ్యాంకుల నుంచిగాని సిబిఐకి ఎటువంటి ఫిర్యాదులు అందలేదని వెల్లడించారు. 

అయితే ఇదే అంశపై పిటీషనర్ దాఖలు చేసిన ఫిర్యాదుపైన పరిశీలన జరుగుతున్నట్టు తెలిపారు. ఈ వ్యవహారంలో కేంద్ర ప్రభుత్వ ఉద్యోగులు, రాష్ట్ర ప్రభుత్వ పాత్ర ఏంటని తేలాల్సి ఉందని చెప్పారు. కేవలం రాష్ట్ర ఉద్యోగులే ఉంటే నేరుగా జోక్యం చేసుకోవడానికి తమకు అవకాశం ఉండదని స్పష్టం చేశారు. కేంద్ర ప్రభుత్వ అధికారుల పాత్రవుంటే విచారణకు అవకాశాలు ఉంటాయని, అదే రాష్ట్ర ప్రభుత్వ ఆధికారుల ప్రమేయం ఉంటే మాత్రం నేరుగా జోక్యం చేసకునే అవకాశం సిబిఐకి ఉండదని వివరించా రు.