కాళేశ్వ‌రంపై ఎప్పుడు దర్యాప్తు ఆదేశిస్తారు రేవంత్!

కాళేశ్వరం ప్రపంచంలోనే భారీ ఎత్తిపోతల ప్రాజెక్టు, ఇంజనీరింగ్ మార్వెల్, కేసీఆర్ అపరభగీరథుడని బీఆర్ఎస్ నాయకులు గొప్పలు చెప్పారని, ప్రాజెక్టు నిర్మాణంలో 7 బుర్జ్ ఖలీఫాలకు సమానమైన కాంక్రీట్ ను వాడడం,15 ఈఫిల్ టవర్ల నిర్మాణానికి సరిపడే ఉక్కును ఉపయోగించినట్లు ప్రచారం చేసుకున్నారని కేంద్ర మంత్రి ఎద్దేవా చేశారు.

డిస్కవరీ చానళ్లలో కేసీఆర్ చీఫ్ ఇంజినీర్ గా పొగడ్తలతో డాక్యుమెంటరీల ప్రదర్శించారని, 80 వేల పుస్తకాలు చదివిన కేసీఆర్ చీఫ్ ఇంజినీర్ అవతారమెత్తి కట్టిన ప్రాజెక్టు కాళేశ్వరం ప్రాజెక్టు భవిష్యత్తు అంధకారంగా మారిందని మండిపడ్డారు.

కాళేశ్వరం ప్రాజెక్టుకు లైఫ్ లైన్ గా ఉన్న మేడిగడ్డ బ్యారేజ్ కుంగిందని, అన్నారం బ్యారేజీ గ్యారెంటీ లేకుండా పోయిందని, కాళేశ్వరం ప్రాజెక్టు వైఫల్యంతో ప్రజాధనాన్ని గోదావరిపాలు చేశారని ఆరోపించారు. ప్రాజెక్టు కట్టడంలో జరిగిన అవినీతిపై విచారణకు ఆదేశించకుండా కాంగ్రెస్ ప్రభుత్వం ఎందుకు మీనమేషాలు లెక్కిస్తోందని కిషన్ రెడ్డి నిలదీశారు. కాళేశ్వరం ప్రాజెక్టు విషయంలో నాడు రేవంత్ రెడ్డి బిజెపి ఏం చేస్తోందంటూ పదేపదే మాట్లాడారని గుర్తు చేస్తూ మరి నేడు మీ వైఖరేంటో సమాధానం చెప్పాలని ప్రశ్నించారు.