భారత్ అట్టా (గోధుమ పిండి), భారత్ పప్పు (పప్పు ధాన్యాలు) తర్వాత, వచ్చే ఏడాది సార్వత్రిక ఎన్నికలకు ముందు పెరుగుతున్న తృణధాన్యాల ధరలను నియంత్రించడానికి భారత్ బియ్యాన్ని తగ్గింపు ధరలకు విక్రయించాలని కేంద్రం యోచిస్తోంది.
నేషనల్ అగ్రికల్చరల్ కోఆపరేటివ్ మార్కెటింగ్ ఫెడరేషన్ ఆఫ్ ఇండియా (నాఫెడ్), నేషనల్ కో ఆపరేటివ్ కన్స్యూమర్స్ ఫెడరేషన్ ఆఫ్ ఇండియా లిమిటెడ్ (ఎన్సీసీఎఫ్), కేంద్రీయ భండార్ ఔట్లెట్లు, మొబైల్ వ్యాన్లు వంటి ప్రభుత్వ సంస్థల ద్వారా భారత్ బియ్యాన్ని రూ.25కే అందించాలని భావిస్తోంది.
ప్రస్తుతం సగటు రిటైల్ ధర కిలో బియ్యం ధర రూ .43.30కు చేరుకున్న సమయంలో బియ్యం రిటైల్ ధరను తగ్గించాలని కేంద్రం భావిస్తోంది. గత ఏడాది కాలంలో బియ్యం ధర 14.1% పెరిగింది. తక్కువ ధరకు భారత్ బ్రాండ్ పేరుతో బియ్యాన్ని సరఫరా చేయాలనే ఆలోచన వెనుక పెరుగుతున్న ధరలను నియంత్రించి, ద్రవ్యోల్బణాన్ని కట్టడి చేయాలన్న ఆలోచన ఉంది.
ప్రస్తుతం కేంద్ర ప్రభుత్వం భారత్ బ్రాండ్ కింద వినియోగదారులకు గోధుమ పిండి, శనగపప్పు (స్ప్లిట్ శనగలు) కిలో రూ.27.50, రూ.60 రాయితీ ధరలకు విక్రయిస్తోంది. వీటిని దేశవ్యాప్తంగా 2 వేలకు పైగా ఔట్ లెట్స్ లో విక్రయిస్తున్నారు. భారత్ బియ్యాన్ని విక్రయించే ప్రక్రియ భారత్ పప్పు, అట్టా మాదిరిగానే ఉంటుందని అధికారులు తెలిపారు.
నేషనల్ డెయిరీ డెవలప్మెంట్ బోర్డు అనుబంధ సంస్థ అయిన మదర్ డెయిరీ కిరాణా చైన్ సఫల్ సహా వివిధ మార్గాల ద్వారా కిలో ఉల్లిని రూ .25 చొప్పున సబ్సిడీ రిటైల్ అమ్మకాలను ప్రభుత్వం ఇప్పటికే ప్రారంభించింది. గత కొన్ని నెలలుగా నిత్యావసర ఆహారధాన్యాల ధరలను నియంత్రించడంతో పాటు రైతులకు గిట్టుబాటు ధర కల్పించేందుకు ప్రభుత్వం అనేక చర్యలు చేపట్టింది.
అందులో భాగంగానే, ఈ జులై నెలలో బాస్మతియేతర బియ్యం ఎగుమతులను నిషేధించింది. దేశీయ మార్కెట్లో బియ్యం లభ్యతను పెంచడానికి ఫుడ్ కార్పొరేషన్ ఆఫ్ ఇండియా (ఎఫ్సిఐ) బహిరంగ మార్కెట్ సేల్స్ స్కీమ్ (ఒఎంఎస్ఎస్) కింద, 400,000 టన్నుల బియ్యాన్ని కిలోకు రూ .29 లకు విక్రయిస్తోంది.
More Stories
చైనాలో ఆర్థిక సవాళ్లు నిజమేనన్న జిన్‌పింగ్
ఏప్రిల్‌లో గరిష్ట స్థాయికి చేరిన జీఎస్‌టీ వసూళ్లు
బాబా రాందేవ్‌కు సుప్రీంకోర్టు ప్రశంసలు