కర్ణాటకలో హిజాబ్పై ఉన్న నిషేధాన్ని ఎత్తి వేస్తున్నట్లు ఆ రాష్ట్ర ముఖ్యమంత్రి సిద్ధరామయ్య ప్రకటించారు. నచ్చిన దుస్తులు ధరించే స్వేచ్ఛ ప్రజలకు ఉందని ఉద్ఘాటించారు. కొంతకాలంగా కర్ణాటకలో హిజాబ్ పై చెలరేగుతున్న వివాదం దేశవ్యాప్తంగా కలకలం రేపుతోంది. విద్యాసంస్థల్లో హిజాబ్ వేసుకోవడాన్ని నిషేధిస్తూ అప్పటి బీజేపీ ప్రభుత్వం ఆదేశాలు జారీ చేయడం ప్రకంపనలే సృష్టించింది.
పలు బిజెపి పాలిత రాష్ట్ర ప్రభుతాలు సహితం హిజాబ్ పై నిషేధం విధించాయి. హిజాబ్పై నిషేధానికి వ్యతిరేకంగా కర్ణాటక హైకోర్టులో పిటిషన్లు వెల్లువెత్తాయి. అయితే ప్రభుత్వానికి అనుకూలంగా తీర్పునిచ్చింది హైకోర్టు. కచ్చితంగా హిజాబ్ వేసుకోవాలి, ఇస్లాం మతంలో లేదని,విద్యాసంస్థలు విద్యార్థుల డ్రెస్ కోడ్ని నిర్ణయించుకోవచ్చని స్పష్టం చేసింది.
ఈ వ్యవహారం సుప్రీంకోర్టు వరుకూ వెళ్లింది. ద్విసభ్య ధర్మాసనం నుంచి భిన్న అభిప్రాయాలు వ్యక్తమయ్యాయి. యూనిఫామ్ని నిర్ణయించే హక్కు విద్యాసంస్థలకు ఉందని ఒక జడ్జి అభిప్రాయపడగా, హిజాబ్ వేసుకోవాలా? వద్దా? అనేది ఛాయిస్ అని మరో న్యాయమూర్తి పేర్కొన్నారు.
మొదటి నుండి కాంగ్రెస్ పార్టీ హిజాబ్ పై నిషేధాన్ని వ్యతిరేకిస్తూ వస్తున్నది. తాజాగా మైసూర్లో జరిగిన ఓ కార్యక్రమంలో పాల్గొన్న సీఎం సిద్ధరామయ్య “మీకు నచ్చిన దుస్తులు వేసుకోండి. మీకు నచ్చిన ఆహారం తినండి. నాకు నచ్చింది నేను తింటాను. నేను ధోతీ వేసుకుంటాను. మీరు ప్యాంటు- షర్టు వేసుకోండి. ఇందులో తప్పేముంది? అందుకే హిజాబ్పై నిషేధాన్ని ఎత్తివేస్తున్నాము” అని ప్రకటించారు.
“మహిళలు హిజాబ్ వేసుకుని ఎక్కడికైనా వెళ్లొచ్చు. గత ప్రభుత్వం ఇచ్చిన ఆదేశాలను వెనక్కి తీసుకోవాలని అధికారులకు చెప్పాను. మహిళలు.. వారికి నచ్చిన దస్తులు వేసుకోవచ్చు,” అని సిద్ధరామయ్య స్పష్టం చేశారు. డిసెంబర్ 23 నుండే ఈ విధానం అమలులోకి వస్తున్నట్లు వెల్లడించారు.
More Stories
రాహుల్ గాంధీ `పాకిస్తాన్ అనుచరుడు’
బ్రిజ్‌ భూషణ్ సింగ్‌ కు బిజెపి సీట్ నిరాకరణ!
అయోధ్య రామమందిరంలో రాష్ట్రపతి ప్రత్యేక పూజలు