జమ్మూలోని అఖ్నూర్ సెక్టార్‌లో భారీ చొరబాటు ప్రయత్నాన్ని భారత సైన్యం విఫలం చేసింది. అంతర్జాతీయ సరిహద్దులో పాకిస్తాన్ చొరబాటుకు ప్రయత్నించింది. దానిని భారత సైన్యం భగ్నం చేసింది. భారీ ఆయుధాలు క‌లిగిన నలుగురు చొరబాటుదారులు అంతర్జాతీయ సరిహద్దు నుండి వైర్ వైపు వస్తున్నారని గమనించిన సైనికులు, ఆ తర్వాత వారిపై కాల్పులు జరిపారు.
ఈ క్ర‌మంలో ఇరు వ‌ర్గాల మ‌ధ్య జరిగిన ఎదురుకాల్పుల్లో న‌లుగురిలో ఓ ఉగ్రవాది హ‌తమ‌య్యాడు. గత కొంత కాలంగా చొరబాటుదారులకు పాకిస్తాన్ నుండి పూర్తి మద్దతు లభిస్తోంది. చొరబాటుదారులు అంతర్జాతీయ సరిహద్దు దాటి భారత్‌లోకి ప్రవేశించేందుకు ప్రయత్నిస్తున్నారు. అదే సమయంలో, భారత సైనికుల దృష్టిని మరల్చడానికి పాకిస్తాన్ సైన్యం కూడా తన పోస్ట్‌లలో ఒకదానికి నిప్పు పెట్టింది.
అయితే అంతర్జాతీయ స‌రిహ‌ద్దుల్లో ఉగ్ర‌వాదుల క‌ద‌లిక‌ల‌పై నిఘా వ‌ర్గాలు సైన్యానికి ప‌క్కా సమాచారం అందించడంతో శుక్రవారం రాత్రి కోహూర్ సెక్టార్‌లో నిఘా ఉంచి, ఉగ్ర‌వాదుల‌ను అడ్డుకున్నారు. చొరబాటును భారత ఆర్మీ అధికారులు ధృవీకరించారు. హతమైన ఉగ్రవాది మృతదేహాన్ని అతని సహచరులు అంతర్జాతీయ సరిహద్దుకు అవతలి వైపుకు లాగినట్లు అధికారులు తెలిపారు.
నిఘా పరికరాల ద్వారా ఈ ఉగ్రవాదులు రాత్రి వేళ చీకటిలో చొరబడుతున్నట్లు కనిపించిందని ఆయన చెప్పారు. భారతదేశం గుజరాత్ నుండి జమ్మూ వరకు పాకిస్తాన్‌తో అంతర్జాతీయ సరిహద్దును పంచుకుంటుంది. అయితే, మనం జమ్మూ నుండి ముందుకు వెళ్ళిన వెంటనే, కాశ్మీర్ నుండి నియంత్రణ రేఖ ప్రారంభమవుతుంది.
ఇదిలావుంటే, ఇటీవల జమ్మూ కశ్మీర్‌లోని పూంచ్ జిల్లాలో ఉగ్రవాదులు రెండు ఆర్మీ వాహనాలపై మెరుపుదాడి చేశారు. దాడి జరిగిన ప్రదేశంలో అనుమానాస్పద స్థితిలో మృతి చెందిన ముగ్గురి మృతదేహాలు లభ్యమయ్యాయి. వారు ఎలా మరణించారు అనే దానిపై ఇంకా అధికారిక సమాచారం వెల్లడి కాలేదు. ఆర్మీ వాహనంపై ఉగ్రవాదులు జరిపిన దాడిలో ఐదుగురు జవాన్లు వీరమరణం పొందగా, మరో ఇద్దరు గాయపడ్డారు. పోలీసులు విచారణ నిమిత్తం తీసుకెళ్లిన వారిలో మృతదేహాలు లభ్యమైన వారు కూడా ఉన్నారు.
More Stories
జమ్మూకాశ్మీర్‌లో భారీ ఉగ్రదాడి.. ఎయిర్‌ఫోర్స్‌ కాన్వాయ్‌పై కాల్పులు
వన్డేలు, టీ20లో అగ్రస్థానంలో టీమ్‌ఇండియా
సర్వేల పేరుతో ఓటర్ల వివరాలు సేకరిస్తే చర్యలు