11 మంది మంత్రులతో కొలువుదీరిన రేవంత్ రెడ్డి ప్రభుత్వం

పాలకులం కాదు సేవకులం అన్నట్లుగా పని చేస్తామని ఈ సందర్భంగా ప్రసంగిస్తూ రేవంత్ రెడ్డి చెప్పారు. “ప్రగతి భవన్ వద్ద ఉన్న ఇనుప కంచెలను బద్ధలు కొట్టించాం. రాష్ట్ర ముఖ్యమంత్రిగా మాటిస్తున్నాను. నా తెలంగాణ కుటుంబ ప్రజలు ఎప్పుడు రావాలనుకున్నా… ప్రగతి భవన్ లోకి రావొచ్చు. ప్రజలు వారి ఆలోచనలను ప్రభుత్వంతో పంచుకోవచ్చు” అని ప్రకటించారు. 

జ్యోతిరావు పూలే ప్రజా భవన్ లో శుక్రవారమే  ప్రజాదర్భార్ నిర్వహిస్తానని వెల్లడించారు.  ఇందిరమ్మ రాజ్యంలో సోనియామ్మ అండతో ప్రజలకు మేలైన సంక్షేమంతో పాటు అభివృద్ధిని చూసి చూపిస్తామని హామీ ఇచ్చారు. పాలకులం కాదు సేవకులం అనే విధంగా పని చేస్తానని చెబుతూ కాంగ్రెస్ కార్యకర్తలను గుండెల్లో పెట్టి చూసుకుంటానని రేవంత్ రెడ్డి భరోసా ఇచ్చారు.

“పోరాటాలు, త్యాగాల పునాదులపై తెలంగాణ రాష్ట్రం ఏర్పడింది. స్వేచ్ఛ, సామాజిక న్యాయం, సమాన అభివృద్ధి కోసం ఉక్కు సంకల్పంతో సోనియమ్మ తెలంగాణ ఏర్పాటు చేసింది. దశాబ్ద కాలపు నిరంకుశ పాలనకు ప్రజలు చరమగీతం పాడారు. ప్రజా ప్రభుత్వాన్ని ఏర్పాటు చేశారు. అమరుల ఆశయ సాధనకు ఇందిరమ్మ రాజ్యం ప్రతినబూనింది” అని చెప్పారు. 

“రాష్ట్ర ముఖ్యమంత్రిగా మాట ఇస్తున్నా… ప్రభుత్వంలో ప్రజలే భాగస్వాములు. రేపు ఉదయం 10 గంటలకు జ్యోతీరావు పూలే ప్రజా భవన్ లో ప్రజా దర్బారు నిర్వహిస్తాం మీరు ఇచ్చిన అవకాశాన్ని ఈ ప్రాంత అభివృద్ధికి వినియోగిస్తాం” అని ముఖ్యమంత్రి రేవంత్ రెడ్డి స్పష్టం చేశారు.