రాజ్‌పుత్‌ నేత హత్యకు నిరసనగా రాజస్థాన్ లో నిరసనలు

ప్రముఖ రాజ్‌పుత్‌ నేత సుఖ్‌దేవ్‌ సింగ్‌ గోగమేడి హత్యకు నిరసనగా బుధవారం ఆయన మద్దతుదారులు రాజస్థాన్‌ బంద్‌కు పిలుపునిచ్చారు. నిందితులను వెంటనే అరెస్ట్‌ చేయాలంటూ రాష్ట్ర వ్యాప్తంగా సుఖ్‌దేవ్‌ సింగ్‌ మద్దతుదారులు నిరసనలు చేపట్టారు.  జైపూర్‌తో పాటు బుండి, అజ్మేర్‌, మధోపూర్‌, చిత్తోర్‌ఘఢ్‌ వంటి జిల్లాలోనూ కార్యాలయాలు, పాఠశాలలు, దుకాణాలు మూసివేశారు.

జైపూర్‌లోని ఖాతిపురా రహదారిని ఆందోళనకారులు దిగ్భంధించారు. సుఖదేవ్‌ సింగ్‌ గోగమేది మృత దేహాన్ని ఉంచిన మెట్రో మాస్‌ ఆసుపత్రి వద్ద భారీ సంఖ్యలో కర్ణిసేన మద్దతుదారులు మోహరించారు. గోగమేది హత్యకు రాష్ట్ర పోలీసులదే బాధ్యత అని రాజ్‌పుత్‌ కర్ణిసేన జాతీయ అధ్యక్షులు మహిపాల్‌ సింగ్‌ మక్రాన్‌ ఆరోపించారు.

‘గోగమేది హత్య గురించి పంజాబ్‌ పోలీసుల నుంచి ఇంటెలిజెన్స్‌ నివేదిక వచ్చింది. కానీ రాజస్థాన్‌ పోలీసులు ఆయనకు భద్రత కల్పించ లేదు. ఇది పోలీసుల వైఫల్యం’ అని మక్రాన్‌ స్పష్టం చేశారు. డిజిని తొలగించి, నిర్లక్ష్యంగా వ్యవహరించిన పోలీసు అధికారులపై చర్యలు తీసుకోవాలని డిమాండ్‌ చేశారు. నిందితులను పట్టుకోకపోతే దేశవ్యాప్తంగా ఆందోళనలను చేస్తామని హెచ్చరించారు.