స్కిల్‌ కేసులో చంద్రబాబుకు రిమాండ్ పొడిగింపు

స్కిల్ డెవలప్ మెంట్ స్కామ్ కేసులో టిడిపి చంద్రబాబు రిమాండ్ ను ఏసీబీ కోర్టు మరోసారి పొడిగించింది. చంద్రబాబు రిమాండ్ నేటితో ముగియనుండడంతో పోలీసులు ఆయనను వర్చువల్ గా జడ్జి ముందు ప్రవేశపెట్టారు.  చంద్రబాబు రిమాండ్‌‌తో పాటు ఇతర కేసుల వ్యవహారంలో ఉన్నత కోర్టుల్లో విచారణ పెండింగ్‌లో ఉండటంతో నవంబర్‌ 1వరకు రిమాండ్‌ పొడిగిస్తున్నట్లు ఏసీబీ న్యాయమూర్తి ప్రకటించారు. సెప్టెంబర్ 10వ తేదీ నుంచి చంద్రబాబు నాయుడు రాజమండ్రి జైల్లో రిమాండ్‌ ఖైదీగా ఉంటున్నారు.

ఈ క్రమంలో జైలులో తన సెక్యూరిటీ విషయంలో పలు అనుమానాలు ఉన్నాయని చంద్రబాబు కోర్టుకు తెలిపారు.  తాను జడ్ ప్లస్ సెక్యూరిటీ కలిగిన వ్యక్తినని జడ్జికి వివరించారు. జైల్లో పరిస్థితులపై ఏమైనా అనుమానాలుంటే రాతపూర్వకంగా తెలియచేయాలని జడ్జి సూచించారు. చంద్రబాబు లేఖను తనకు పంపించాలని జైలు అధికారులకు జడ్జి హిమబిందు ఆదేశించారు.

చంద్రబాబు ఆరోగ్యం విషయంలో దాఖలైన పిటిషన్ల నేపథ్యంలో జడ్జి స్పందించారు. చంద్రబాబు ఆరోగ్యంపై అధికారులను ఆరా తీశారు. వైద్యులు రోజువారీ తనిఖీలు నిర్వహిస్తున్నారా లేదో ప్రశ్నించారు. ఆరోగ్య సమస్యల విషయంలో చంద్రబాబుకు ఏమైనా కోర్టు దృష్టికి తీసుకువెళ్లాలని భావిస్తే వాటిని కూడా రాతపూర్వకంగా తెలియ చేయాలని సూచించారు. చంద్రబాబు లేఖను సీల్డ్‌ కవర్‌లో కోర్టుకు పంపాలని జైలు అధికారులకు ఏసీబీ కోర్టు జడ్జి సూచించారు.