తెలంగాణాలో నవంబర్ 30న ఎన్నికలు

• మిజోరంలో నవంబర్​ 7న ఒక దశలో పోలింగ్​ జరగనుంది. డిసెంబర్​ 3న కౌంటింగ్​ ప్రక్రియ ఉంటుంది.
• ఛత్తీస్​గఢ్​లో రెండు దశల్లో ఎన్నికలు జరగనున్నాయి. మొదటి దశ తేదీ నవంబర్​ 7గా ఉండగా, రెండో దశ తేదీ నవంబర్​ 17గా ఉంది. డిసెంబర్​ 3న ఫలితాలు వెలువడతాయి.
• మధ్యప్రదేశ్​లో నవంబర్​ 17న ఒకే దశలో పోలింగ్​ జరగనుంది. డిసెంబర్​ 3న ఫలితాలను ప్రకటిస్తుంది ఈసీ.
• రాజస్థాన్​లో నవంబర్​ 23న పోలింగ్​ ఉంటుంది. ఫలితాలు డిసెంబర్​ 3న బయటకు వస్తాయి.
• తెలంగాణాలో నవంబర్​ 30న ఒక దశలో పోలింగ్​ జరుగుతుంది. అన్ని రాష్ట్రాలతో కలిపి.. డిసెంబర్​ 3న ఫలితాలు వెలువడతాయి.

5 రాష్ట్రాల్లో 1.77లక్షల పోలింగ్​ కేంద్రాలను ఏర్పాటు చేస్తున్నామని ఎన్నికల సంఘం వెల్లడించింది. ఈ 1.77లక్షల పోలింగ్​ కేంద్రాల్లో 17,734 మోడల్​ పోలింగ్​ స్టేషన్స్​ ఉంటాయని, 621 పోలింగ్​ కేంద్రాలను పీడబ్ల్యూడీ సిబ్బంది నిర్వహిస్తారని స్పష్టం చేసింది. ఈసారి 5 రాష్ట్రాల్లో దాదాపు 60లక్షల మంది తొలిసారి ఓటు హక్కు సాధించారని తెలిపింది. మొత్తం మీద ఈ 5 రాష్ట్రాల్లో దాదాపు 16కోట్ల మంది ఓటర్లు ఉన్నారు.

ఈ సంద‌ర్భంగా సీఈసీ రాజీవ్ కుమార్ మాట్లాడుతూ 40 రోజుల్లో ఐదు రాష్ట్రాల్లో ప‌ర్య‌టించి,  ఐదు రాష్ట్రాల అధికారులు, పార్టీల నేత‌ల‌తో చ‌ర్చ‌లు జ‌రిపామని తెలిపారు. వివిధ రాజ‌కీయ పార్టీల నుంచి అభిప్రాయాలు తీసుకున్నామని, ఈ ఐదు రాష్ట్రాల ఎన్నిక‌ల కోసం ఆరు నెల‌లుగా క‌స‌ర‌త్తు చేస్తున్నాం అని వివరించారు.

తెలంగాణ‌లో 119, ఛ‌త్తీస్‌గ‌ఢ్‌లో 90, మిజోరాంలో 40, రాజ‌స్థాన్‌లో 200, మ‌ధ్య‌ప్ర‌దేశ్‌లో 230 అసెంబ్లీ స్థానాల‌కు ఎన్నిక‌లు నిర్వ‌హించ‌నున్న‌ట్లు సీఈసీ పేర్కొన్నారు. మొత్తంలో ఐదు రాష్ట్రాల్లో 679 శాస‌న‌స‌భ స్థానాలున్నాయ‌ని తెలిపారు. మిజోరాం శాస‌న‌స‌భ ప‌ద‌వీకాలం డిసెంబ‌ర్ 17, ఛ‌త్తీస్‌గ‌ఢ్ జ‌న‌వ‌రి 3, మ‌ధ్య‌ప్ర‌దేశ్ జ‌న‌వ‌రి 8, రాజ‌స్థాన్ జ‌న‌వ‌రి 14, తెలంగాణ శాస‌న‌స‌భ ప‌ద‌వీకాలం జ‌న‌వ‌రి 18 ముగియనున్న‌ట్లు పేర్కొన్నారు.