గోవాలో జి20 పర్యాటక మంత్రుల సదస్సు నేటి నుండే

ప్రపంచ ప్రసిద్ధ పర్యాటక ప్రాంతాల్లో ఒకటైన గోవా జీ-20 పర్యాటక వర్కింగ్ గ్రూప్ చివరి సమావేశాలతో పాటు జీ-20 పర్యాటక మంత్రుల  కాన్ఫరెన్సుకు సిద్ధమైంది. సోమవారం నుంచి నాలుగు రోజుల పాటు జరగనున్న సమావేశాలకు గోవా దేశంలోనే అత్యుత్తమ పర్యాటక ప్రాంతమని కేంద్ర పర్యాటక శాఖ కార్యదర్శి వి. విద్యావతి చెప్పారు.

సుందరమైన బీచ్‌లకు, అద్భుత వారసత్వ సంపదకు, ప్రకృతి సౌందర్యానికి, ఎకో టూరిజంతో పాటు గొప్ప సంస్కృతితో కూడిన అనేక అనుభవాలకు వేదిక గోవా అని, అందుకే పర్యాటక వర్కింగ్ గ్రూప్ చివరి సమావేశాన్ని నిర్వహించేందుకు ఎంపిక చేశామని వెల్లడించారు.

వర్కింగ్ గ్రూప్ ద్వారా విజయవంతమైన చర్చలు ఆర్థిక వృద్ధిని ప్రోత్సహిస్తాయని, సాంస్కృతిక వారసత్వాన్ని కాపాడడంతో పాటు స్థిరమైన అభివృద్ధిని ప్రోత్సహిస్తాయని ఆమె తెలిపారు. జీ-20కు ఈ ఏడాది నాయకత్వం వహిస్తున్న భారత్ పర్యాటక విభాగంలో గ్రీన్ టూరిజం, డిజిటలైజేషన్, స్కిల్స్, పర్యాటక రంగంలో సూక్ష్మ, చిన్న, మధ్య తరహా పరిశ్రమలు, డెస్టినేషన్ మేనేజ్‌మెంట్ అనే ఐదు అంశాలను ప్రాధాన్యంగా తీసుకుందని ఆమె వివరించారు.

ఈ ప్రాధాన్యతలు 2030 వరకు నిర్దేశించుకున్న సుస్ధిరాభివృద్ధి లక్ష్యాలు సాధించడానికి కీలక సాధనాలని ఆమె చెప్పారు. ముగింపు సమావేశంలో జీ-20 సభ్య దేశాలతో పాటు ఆహ్వానిత దేశాలు, అంతర్జాతీయ సంస్థలు ఖరారు చేసిన సంస్కరణలను స్వాగతించి ఆమోదిస్తాయని విద్యావతి ఆశాభావం వ్యక్తం చేశారు.