తమిళనాడు మంత్రిపై ఐటి సోదాలు.. ఐటి బృందంపై దాడులు

తమిళనాడు రాష్ట్ర విద్యుచ్ఛక్తి శాఖ మంత్రి వి సెంథిల్ బాలాజీ సంబంధిత వ్యక్తులపై ఆదాయపు పన్ను శాఖ శుక్రవారం సోదాలు నిర్వహించింది. ఈ దశలో ఐటి బృందంపై దాడులు జరిగాయి. సెంథిల్, ఆయన సోదరుడు, కొందరు బంధువులు, స్నేహితులపై ఐటి శాఖ విస్తృత దాడులు సంచలనం కల్గించాయి. రాష్ట్ర ముఖ్యమంత్రి స్టాలిన్ సింగపూర్, జపాన్‌లకు అధికార పర్యటనకు వెళ్లిన దశలో, రాష్ట్రంలో అధికార పార్టీ సీనియర్ నేత సబంధితుల ఇళ్లలో ఐటి దాడులు రాజకీయ ప్రకంపనలకు దారితీశాయి.

కరూర్, ఈరోడ్, కోయంబత్తూరుల్లోని వీరి నివాసాలపై ఐటి సోదాలు జరిగాయి. కాగా కరూర్‌లో ఐటి అధికారుల బృందంపై సోదాల దశలో ఓ బృందం దాడికి దిగింది. వారి వాహనాన్ని ధ్వంసం చేసింది. కొందరు జరిపిన దాడిలో గాయపడ్డ ఐటి అధికారులను స్థానిక ప్రభుత్వ ఆసుపత్రికి చికిత్సకు తరలించారు. ఐటి బృందం రావడం గమనించి కొందరు ముందుగా అక్కడున్న వాహనాలను ధ్వంసం చేశారు. ఈ క్రమంలో శనివారం నాడు ఐటీ అధికారులకు సీఆర్‌పీఎఫ్‌ బలగాలతో భద్రత కల్పించడం గమనార్హం.