హిందూజా గ్రూప్ చైర్మన్ ఎస్పీ హిందూజా కన్నుమూత

శ్రీచంద్ పరమానంద్ హిందూజా కు బ్రిటిష్ పౌరసత్వం ఉంది. 1964లో బాలీవుడ్ బ్లాక్‌బస్టర్ చిత్రం ‘సంగం’ అంతర్జాతీయ పంపిణీ హక్కులతో ప్రారంభమైన అతని వ్యాపార విజయాలు అతన్ని బ్రిటన్‌లోని అత్యంత ధనవంతులలో ఒకరిగా మార్చాయి.  హిందూజా గ్రూప్ భారత్ సహా పలు దేశాల్లో వ్యాపార కార్యకలాపాలు నిర్వహిస్తుంటుంది.

ఎస్పీ హిందూజా సోదరులు గోపీచంద్ హిందూజా, ప్రకాశ్ హిందూజా, అశోక్ హిందూజా కూడా హిందూజా గ్రూప్ వ్యాపార కార్యకలాపాల్లో కీలక హోదాల్లో ఉన్నారు. 87 ఏళ్ల శ్రీ చంద్ పరమానంద్ హిందూజా గత కొంతకాలంగా వృద్ధాప్య సంబంధ అనారోగ్యాలతో బాధపడుతున్నారు. బుధవారం లండన్ లోని తన నివాసంలో ఆయన తుది శ్వాస విడిచారు.

ఎస్పీ హిందూజా ఈ ఏడాది జనవరిలో తన భార్య మధుని కోల్పోయారు. ఆమె వయస్సు 82. ఆయనకు కుమార్తెలు, షాను,వినూ ఉన్నారు. శ్రీ చంద్ పరమానంద్ హిందూజా1935 లో ప్రస్తుత పాకిస్తాన్ లోని కరాచీలో జన్మించారు.

 చిన్న వయస్సులోనే తండ్రి వ్యాపార కార్యకలాపాల్లో పాలు పంచుకున్నారు. టెక్స్ టైల్, ట్రేడింగ్, ఐరన్ ఓర్ బిజినెస్ లలో రాణించారు. ఇరాన్ లోని టెహ్రాన్ కు భారత్ నుంచి ఉల్లిగడ్డలు, బంగాళాదుంపలు వంటి ఆహార పదార్ధాలను ఎగుమతి చేసి విశేషంగా లాభాలను ఆర్జించారు. ఆ తరువాత క్రమంగా తమ వ్యాపారాలను విస్తరించారు.

1919లో ఇరాన్‌కు వెళ్లడానికి ముందు భారతదేశంలోని సింధ్ ప్రాంతంలో (ప్రస్తుతం పాకిస్థాన్) వస్తువుల వ్యాపారం చేసే పరమానంద్ దీప్‌చంద్ హిందూజా ద్వారా హిందూజా గ్రూప్‌ను ప్రారంభించారు. 1964లో SP ఎస్పీ హిందూజా రాజ్ కపూర్ నటించిన ‘సంగం’ చిత్రాన్ని మిడిల్-ఈస్ట్ మార్కెట్‌లలో పంపిణీ చేశారు. ఇది అతని మొదటి మిలియన్ డాలర్లను సంపాదించడానికి సహాయపడింది.

అధిక చమురు ధరలపై ఇందిరాగాంధీ ఇరాన్ షాతో విభేదించినప్పుడు, SP, అతని సోదరులు పర్షియన్ గల్ఫ్ దేశానికి భారతీయ ఎగుమతులను పెంచడానికి, వస్తువులకు ఇనుప ఖనిజాలను రవాణా చేయడంలో కీలక పాత్ర పోషించారు.

బ్రిటిష్ లేలండ్ ను కొనుగోలు చేసి అశోక్ లేలండ్ గా భారీ వాహన ఉత్పత్తి సంస్థగా తీర్చి దిద్దారు. అనంతరం గల్ఫ్ ఆయిల్ ను కొనుగోలు చేశారు. 1993లో ఇండస్‌ఇండ్ బ్యాంక్‌తో బ్యాంకింగ్‌లోకి ప్రవేశించారు. బ్యాంకు ప్రారంభోత్సవానికి అప్పటి ఆర్థిక మంత్రి మన్మోహన్‌సింగ్‌ను ఆహ్వానించారు. 1994లో స్విట్జర్లాండ్‌లోని జెనీవాలో ఏకైక భారతీయ యాజమాన్యంలోని స్విస్ బ్యాంక్ బాంక్వీ ప్రైవేని స్థాపించాడు.

రాజీవ్ గాంధీ ప్రధానిగా ఉన్న సమయంలో ఆయనతో అత్యంత సన్నిహితంగా ఉండేవారు. ఈ నేపథ్యంలోనే బోఫోర్స్ కుంభకోణంలో హిందూజా సోదరులు భారీగా లాభపడ్డారనే ఆరోపణలు వెల్లువెత్తాయి. ఆయన ఇద్దరు తమ్ముళ్లు స్వీడన్ గన్‌మేకర్ ఎబి బోఫోర్స్‌కు భారత ప్రభుత్వ కాంట్రాక్ట్‌ను పొందడంలో సాయం చేసినట్లు ఆరోపణలున్నాయి.

ఇందుకోసం అక్రమ రూ.64 కోట్లు ముడుపులు అందుకున్నారని ఆరోపణలు ఎదుర్కొన్నారు. అయితే శ్రీచంద్ పర్మానంద్‌తోపాటు ఆయన ఇద్దరు తమ్ముళ్లు గోపీచంద్‌, ప్రకాష్ హిందూజాలను ఢిల్లీ హైకోర్టు 2005లో నిర్దోషిగా తేల్చింది.