కేసీఆర్ ప్రధాని సీటు ఖాళీగా లేదు.. సీఎం సీటు కాపాడుకో

ప్రధాని కావాలని సీఎం కేసీఆర్ కలలు కంటున్నారు కానీ  ఢిల్లీలో ప్రధాని కుర్చీ ఖాళీగా లేదన్న విషయాన్ని కేసీఆర్ గుర్తించుకోవాలని  కేంద్ర హోంశాఖ మంత్రి అమిత్ షా హితవు చెప్పారు. వచ్చే ఎన్నికల్లో మళ్లీ బీజేపీనే గెలుస్తుందని, దేశానికి  ప్రధానిగా మోదీనే బాధ్యతలు చేపడుతారని స్పష్టం చేస్తూ కేసీఆర్ ముందు తన సీఎం సీటు కాపాడుకుంటే చాలని   ఎద్దేవా చేశారు.

బీజేపీ ఆధ్వర్యంలో ఆదివారం సాయంత్రం నిర్వహించిన చేవెళ్ల విజయ సంకల్ప సభలో మాట్లాడుతూ  “ప్రజల దృష్టి మరల్చేందుకే టీఆర్ఎస్ పార్టీ పేరును బీఆర్ఎస్‍గా కేసీఆర్ మార్చారు. తెలంగాణలోనే కేసీఆర్ పని అయిపోనుంది. కానీ ఆయన దేశం గురించి మాట్లాడుతున్నారు. ప్రధాన మంత్రి కావాలని కేసీఆర్ కలలు కంటున్నారు. అక్కడ.. ఇక్కడ.. తిరుగుతున్నారు. తెలంగాణ ప్రజలు అంతా అర్థం చేసుకుంటున్నారు. ప్రధాన మంత్రి కుర్చీ ఖాళీ లేదు. ఆ పీఠాన్ని మళ్లీ నరేంద్ర మోదీనే అధిష్టించనున్నారు” అని అమిత్ షా తేల్చి చెప్పారు.

బీఆర్ఎస్ పేరుతో కేసీఆర్‌ దేశమంతా విస్తరించాలనుకుంటున్నారని, అందులో భాగంగా ప్రజా ధనాన్ని దుర్వినియోగం చేస్తున్నారని కేంద్ర మంత్రి విమర్శించారు.   తెలంగాణ రాష్ట్రం కేసీఆర్ కుటుంబానికి ఏటీఎంలా మారిందని అమిత్ షా విమర్శించారు. బీఆర్ఎస్ మొత్తం అవినీతిలో కూరుకుపోయిందని ఆరోపించారు.

కేంద్రం ఇస్తున్న నిధులను బీఆర్ఎస్ పార్టీ దోచుకుంటోందని ఆయన విమర్శించారు. ప్రధాని మోదీ అమలు చేస్తున్న పథకాలు సామాన్య ప్రజలకు అందకుండా తెలంగాణ ప్రభుత్వం అడ్డుకుంటోందని అమిత్ షా ఆరోపించారు.  కేసీఆర్ ను గద్దే దించే వరకు తమ పోరాటం ఆగదన్న అమిత్ షా సీఎం కేసీఆర్ ఏం చేసినా తెలంగాణలో బీజేపీ అధికారంలోకి  వస్తోందని  జోస్యం చెప్పారు.   ప్రజలు తమవైపే ఉన్నారని పేర్కొంటూ  రాష్ట్రంలో అవినీతి సర్కార్ నడుస్తోందని, కేసీఆర్ సర్కార్ పనితీరును దేశం  మొత్తం చూస్తోందని తెలిపారు.