అప్పులపై చర్చలకు హరీష్ కు ఈటెల సవాల్!

రాష్ట్రంలో ప్రభుత్వం చేస్తున్న అప్పులపై ఆర్థిక మంత్రి హరీష్ రావు  చర్చకు రావాలని బీజేపీ ఎమ్మెల్యే ఈటెల రాజేందర్ సవాల్ విసిరారు. అప్పుడే ప్రజలకు వాస్తవాలు తెలుస్తాయని తెలిపారు. రాష్ట్రం తీసుకున్న అప్పుల వివరాలు ఆన్‌లైన్‌లో పెట్టాల్సి ఉన్నా కేసీఆర్ పెట్టనివ్వరని ధ్వజమెత్తారు. 
 
అప్పల గురించి ప్రజలకు సమాచారం ఇవ్వకుండా కుట్రపూరితంగా వ్యవహరిస్తోందని మాజీ ఆర్ధిక మంత్రి విమర్శించారు.  సీఎం కేసీఆర్ (ప్రజాధనాన్ని దుర్వినియోగం చేస్తూ.. వారిపై అప్పుల భారం మోపుతున్నారని విమర్శించారు. తెలంగాణ ఆవిర్భావం నాటికి ధనిక రాష్ట్రంగా ఉన్న తెలంగాణను కేసీఆర్ తన అనాలోచిత నిర్ణయాలతో అప్పుల పాలు చేశారని పేర్కొన్నారు.
25 ఏళ్ల కాలపరిమితితో ఇబ్బడిముబ్బడిగా అప్పులు తెస్తూ ప్రజల నెత్తిన రుణ భారం మోపుతున్నారని ఆక్షేపించారు. అప్పటి వరకు తాను ఉండను అనుకొని కేసీఆర్ అడ్డగోలుగా అప్పులు తెస్తున్నారని మండిపడ్డారు. కేసీఆర్ తెలంగాణ ప్రజలకు చేస్తున్న మోసాన్ని త్వరలోనే బహిర్గతమవుతందని చెబుతూ వచ్చే ఎన్నికల్లో మూల్యం చెల్లించుకోక తప్పదని స్పష్టం చేశారు.
 
తెలంగాణ ముఖ్యమంత్రి కేసీఆర్ నియంతలా వ్యవహిరిస్తున్నారని ఈటల రాజేందర్ మండిపడ్డారు. ప్రజాస్వామ హక్కులను కాలరాస్తున్నారని ఆగ్రహం వ్యక్తం చేశారు. తెలంగాణలో పాదయాత్రలకు అనుమతి  ఇవ్వకుండా నియంతలా వ్యవహరిస్తున్నారని ధ్వజమెత్తారు.  వైఎస్సాఆర్‌టీపీ అధ్యక్షురాలు షర్మిలతో పోలీసులు వ్యవహిరించిన తీరు సరిగా లేదని ఆక్షేపణ వ్యక్తం చేశారు.

ఉమ్మడి రాష్ట్రంలో ముఖ్యమంత్రులు ఇలాగే వ్యవహరించి ఉంటే  తెలంగాణ ఉద్యమం నడిచేదా? అని ఆయన ప్రశ్నించారు. కేసీఆర్ ప్రభుత్వం ప్రతిపక్షాల పట్ల అరాచకంగా వ్యవహరిస్తోందని పేర్కొన్నారు. సీఎం కేసీఆర్ చేతుల్లో పోలీసులు కీలు బొమ్మలుగా మారి ఆయన చెప్పిన వారిపై అక్రమ కేసులు పెడుతున్నారు విమర్శించారు. ఈ అరాచకాలకు త్వరలోనే ఎండ్ కార్డు పడనుందని చెబుతూ ప్రజలు తిరగబడే రోజులు దగ్గర్లోనే ఉన్నాయని ఈటల హెచ్చరించారు.