జమ్ము కశ్మీర్లోని ఉదంపుర్లో వరుస పేలుళ్లు సంభవించాయి. 8 గంటల వ్యవధిలో ఒకే చోట రెండు పేలుళ్లు సంభవించాయి. సాధారణంగా కశ్మీర్లో ఉగ్రవాదుల దాడులు, ఎన్కౌంటర్ల ఘటనలు తరచూ వార్తల్లో చూస్తుంటాం. ఐతే ఈసారి బస్సుల్లో బాంబులు పేలడం చర్చనీయాంశమైంది.
బుధవారం రాత్రి ఓ పెట్రోల్ బంక్ దగ్గర ఆగి ఉన్న ఓ బస్సులో పేలుడు సంభవించింది. రాత్రి 10.30 గంటలకు జరిగిన ఈ ఘటనలో ఇద్దరు గాయపడ్డారు. వీరిని జిల్లా ఆస్పత్రికి తరలించారు. పేలుడుకు సంబంధించిన దృశ్యాలు పెట్రోల్బంక్లోని సీసీటీవీలో నిక్షిప్తమయ్యాయి. ఈ ఘటన జరిగిన కొద్ది గంటలకే ఉదంపూర్లోని మరో బస్సులో పేలుడు సంభవించింది.
ఉదయం ఆరు గంటల సమయంలో బస్టాండ్లో ఉన్న ఓ బస్సులో పేలుడు జరిగింది. ఉదంపూర్ నుంచి రామ్నగర్కు ఈ బస్సు వెళ్లాల్సి ఉండగా.. ఒక్కసారిగా పేలుడు సంభవించింది. అయితే, బస్సులో ప్రయాణికులు ఎవరూ లేకపోవడం వల్ల పెను ప్రమాదం తప్పింది.
ఇవి రెండు ప్రమాదాలు కావని, పేలుళ్లే అని పోలీసులు నిర్ధారించారు. ఏ రకమైన బాంబులను ఉపయోగించారనే విషయం తెలియాల్సి ఉందని డీఐజీ సులేమాన్ చౌదరి తెలిపారు. అయితే, వరుస పేలుళ్ల నేపథ్యంలో ప్రజలు భయాందోళనకు గురవుతున్నారు. పోలీసులతో పాటు ప్రభుత్వ ఏజెన్సీలు ఘటనాస్థలికి చేరుకొని దర్యాప్తు మొదలుపెట్టారు.
More Stories
మణిపూర్లో పోలింగ్ కేంద్రం వద్ద కాల్పుల కలకలం
2040 నాటికి రొమ్ము క్యాన్సర్తో మిలియన్ మరణాలు
అనంత్నాగ్ లో మరో వలస కార్మికుడి కాల్చివేత