కాంగ్రెస్ ఖాకీ నిక్కర్ ట్వీట్ పై మండిపడ్డ ఆర్ఎస్ఎస్, బిజెపి

దేశంలో విద్వేషాన్ని పారద్రోలి, ఐక్యతను పెంపొందింప చేయడం కోసం అంటూ కాంగ్రెస్ నేత రాహుల్ గాంధీ చేపట్టిన `భారత్ జోడో యాత్ర’ ప్రారంభించినప్పటి నుండి రోజుకొక్క వివాదం రేపుతున్నది. తాజాగా విద్వేషం నింపే ట్వీట్ కలకలం రేపుతోంది. రాష్ట్రీయ స్వయంసేవక్ సంఘ్ (ఆర్ఎస్ఎస్)ను దృష్టిలో ఉంచుకొని మండుతున్న ఖాఖీ నిక్కర్ ను యాత్ర ప్రచారం కోసం అంటూ కాంగ్రెస్ ట్విట్టర్‌లో పోస్ట్ చేయడంతో పెద్ద రాజకీయ దుమారం చెలరేగింది.

కాంగ్రెస్ సోషల్ మీడియాలో చేసిన ఈ పోస్ట్ పట్ల ఆర్ఎస్ఎస్ తో పాటు బిజెపి నాయకులు తీవ్ర ఆగ్రవేశాలు వ్యక్తం చేశారు. ట్వీట్ వైరల్ అయిన వెంటనే, బిజెపి నాయకులు కాంగ్రెస్‌పై విరుచుకుపడ్డారు. వెంటనే చిత్రాన్ని తొలగించాలని డిమాండ్ చేశారు. ఆర్‌ఎస్‌ఎస్ సర్ సహకార్యవాహ డా.  మన్మోహన్ వైద్య సోమవారం తీవ్రంగా స్పందిస్తూ ఆ  పార్టీ పూర్వ తరాలు (బాప్-దాదా) కూడా ఆర్‌ఎస్‌ఎస్‌ను అడ్డుకోవడానికి ప్రయత్నించాయని గుర్తు చేశారు.

ఈ చిత్రాన్ని ట్విట్టర్‌లో పోస్ట్ చేసిన కాంగ్రెస్, “దేశాన్ని ద్వేషపూరిత వాతావరణం నుండి విముక్తి చేయడం, ఆర్‌ఎస్‌ఎస్-బిజెపి చేసిన నష్టాన్ని పూర్తి చేయడం లక్ష్యంగా మేము దశలవారీగా అడుగులు వేస్తున్నాము” అని రాసింది. “అంచెలంచెలుగా, మేము మా లక్ష్యాన్ని చేరుకుంటాము” అని అది ఇంకా పేర్కొంది.కాంగ్రెస్ ప్రేరేపించిన రాజకీయ వివాదంపై స్పందిస్తూ, ఈ పురాతన  పార్టీ ప్రజలను ద్వేషం ద్వారా కలపాలని కోరుకుంటోందని ఆర్ఎస్ఎస్ ధ్వజమెత్తింది.  అయితే ఈ పార్టీ మునుపటి తరాలుకూడా సంఘ్ పట్ల ద్వేషం, ధిక్కారాన్ని ప్రదర్శించాయని తెలిపింది.

రాయపూర్ లో రాష్ట్రీయ స్వయంసేవక్ సంఘ్ (ఆర్‌ఎస్‌ఎస్) మూడు రోజుల సమన్వయ సమావేశం ముగిసిన తర్వాత విలేకరుల సమావేశంలో డా. వైద్య మాట్లాడుతూ సమాజంలో హిందుత్వానికి “పెరుగుతున్న మద్దతు” ఉందని పేర్కొన్నారు. సంఘ్‌పై గతంలో రెండుసార్లు అకారణంగా నిషేధం విధించారని, కానీ ఆర్ఎస్ఎస్ దేశ ప్రజల మనసు గెలుచుకుంటూ మరింత విస్తరిస్తూ పోతోందని డాక్టర్ వైద్య తెలిపారు. సత్యం, సిద్ధాంతం, త్యాగం, పరిశ్రమ, బలిదానం ద్వారా సంఘ్ సమాజం మద్దతు పొందుతోందని స్పష్టం చేశారు. “వారు (కాంగ్రెస్) ప్రజలను ద్వేషం ద్వారా అనుసంధానించాలనుకుంటున్నారు. మీరు ద్వేషంతో భారతదేశాన్ని ఏకం చేయగలరా? వారు చాలా కాలంగా మనపై ద్వేషం,  ధిక్కారాన్ని కలిగి ఉన్నారు. వారి పూర్వ తరాలు (బాప్-దాదా) కూడా ఆర్‌ఎస్‌ఎస్‌ను ఆపడానికి ప్రయత్నించాయి. కాని మేము పెరుగుతూనే ఉన్నాము. మాకు ప్రజలు మద్దతుగా ఉన్నారు,” అని స్పష్టం చేశారు.

అసోం ముఖ్యమంత్రి హిమంత బిస్వా శర్మ మాట్లాడుతూ, ఈ ట్వీట్ కాంగ్రెస్ సిగ్గుపడే మనస్తత్వాన్ని సూచిస్తోందని మండిపడ్డారు. “కాంగ్రెస్ పార్టీ తన అసలు ఉద్దేశాలను కూడా దాచడం లేదు. ‘భారత్ జోడో’ వేషంలో, ‘భారత్ తోడో’లో మునిగితేలుతోంది. జాతీయవాదులను దెబ్బతీయాలనే వారి ఉద్దేశాలను భారతదేశం క్షమించదు!” అంటూ ట్వీట్ లో హెచ్చరించారు.

ఈ ట్విటర్ పోస్ట్‌పై బీజేపీ అధికార ప్రతినిధి సంబిత్ పాత్రా నిప్పులు చెరిగారు.    “ఇది ‘భారత్ జోడో యాత్ర’ కాదు, ‘భారత్ తోడో’ మరియు ‘ఆగ్ లగావో యాత్ర’. కాంగ్రెస్ పార్టీ ఇలా చేయడం ఇదే మొదటిసారి కాదు. నేను రాహుల్ గాంధీని అడగాలనుకుంటున్నాను. మీకు ఈ దేశంలో హింస కావాలా? కాంగ్రెస్ వెంటనే ఈ చిత్రాన్ని తొలగించాలి” అని డిమాండ్ చేశారు.  

మాజీ కేంద్ర మంత్రి ప్రకాశ్ జవదేకర్ ఇలా ట్వీట్ చేశారు: “పాత #RSS యూనిఫాంను తగులబెట్టడం ద్వారా హింసను ప్రేరేపించినందుకు @INCindiaని మేము ఖండిస్తున్నాము. ఇది దేశభక్తి @RSSorgపై జరిగిన దాడి మాత్రమే కాదు, ఇది భారత ప్రజాస్వామ్యానికి పునాదిపైనే దాడి” అంటూ స్పష్టం చేశారు.

దక్షిణ బెంగళూరు ఎంపీ తేజశ్వి సూర్య, ఈ చిత్రం కాంగ్రెస్ రాజకీయాలకు ప్రతీక అని పేర్కొన్నారు. “1984లో ఢిల్లీని కాంగ్రెస్ అగ్నికి ఆహుతి చేసింది. 2002లో గోద్రాలో 59 మంది కరసేవకులను సజీవ దహనం చేసిన పర్యావరణ వ్యవస్థ. వారు మళ్లీ తమ పర్యావరణ వ్యవస్థను హింసకు పిలుపునిచ్చారు. 

మాజీ కాంగ్రెస్ కేంద్ర మంత్రి, ప్రస్తుతం ఉత్తర ప్రదేశ్ లో బిజెపి ప్రభుత్వంలో మంత్రిగా ఉన్న జితిన్ ప్రసాద స్పందిస్తూ రాజకీయ విభేదాలు సహజమైనవి, అర్థమయ్యేవని చెప్పారు. కానీ రాజకీయ ప్రత్యర్థులను కాల్చడానికి ఏ విధమైన మనస్తత్వం అవసరం? అంటూ ప్రశ్నించారు. ఇటువంటి  ప్రతికూల, ద్వేష రాజకీయాలను అందరూ ఖండించాలని స్పష్టం చేశారు.