చైనా- పాక్ కారిడార్ లో మూడో దేశం… భారత్ అభ్యంతరం

విదేశీ వ్యవహారాల మంత్రిత్వ శాఖ ప్రతినిధి అరిందమ్ బాగ్చీ మాట్లాడుతూ, “ సీపీఈసీ  ప్రాజెక్ట్‌లు అని పిలవబడే” వాటిలో మూడవ దేశాల ప్రతిపాదిత భాగస్వామ్యాన్ని ప్రోత్సహిస్తున్నట్లు రెండు దేశాల వైఖరిని ప్రస్తావిస్తూ “ఏ పార్టీ అయినా అటువంటి చర్యలు భారతదేశ సార్వభౌమాధికారం, ప్రాదేశిక సమగ్రతను నేరుగా ఉల్లంఘించగలవు” అని పేర్కొన్నారు.

అక్రమంగా ఆక్రమించబడిన భారత భూభాగంలో ప్రాజెక్టులు నిర్మిస్తున్నారనే కారణంతో 2013లో ప్రారంభించిన హైవేలు, రైలు మార్గాలు, పవర్ ప్లాంట్లు, తయారీ యూనిట్లు , భారీ మౌలిక సదుపాయాల ప్రాజెక్టుల నెట్‌వర్క్ అయిన  సీపీఈసీ  పట్ల భారతదేశ వ్యతిరేకతను బాగ్చీ పునరుద్ఘాటించారు.

“పాకిస్తాన్ అక్రమంగా ఆక్రమించుకున్న భారత భూభాగంలో ఉన్న  సీపీఈసీ  అని పిలవబడే కార్యకలాపాలను భారతదేశం దృఢంగా, స్థిరంగా వ్యతిరేకిస్తుంది. అలాంటివి స్వాభావికంగా చట్టవిరుద్ధం, ఆమోదయోగ్యం కాదు. భారతదేశం తదనుగుణంగా వ్యవహరిస్తుంది,” అని ఆయన హెచ్చరించారు. 

జూలై 21న జరిగిన అంతర్జాతీయ సహకారం, సమన్వయంపై జరిగిన సీపీఈసీ వర్కింగ్ గ్రూప్  వర్చువల్ మూడవ సమావేశంలో, చైనా,  పాకిస్తాన్ ఆర్థిక కారిడార్‌ను “బహిరంగ, సమ్మిళిత వేదిక”గా అభివర్ణించాయి.  “పరస్పర ప్రయోజనకరమైన మార్గాల నుండి ప్రయోజనం పొందేందుకు ఆసక్తిగల మూడవ పక్షాలను స్వాగతించాయి. సీపీఈసీ ద్వారా సహకారం కోరుతున్నాము” అని పాకిస్తాన్ విదేశాంగ కార్యాలయం విడుదల చేసిన ఒక ప్రకటనలో పేర్కొంది.