టిఎంసి ఎంపీ కాళీమాతపై చేసిన వ్యాఖ్యలపై దుమారం 

కాళీ దేవిని మాంసాహారం, మద్యం సేవించే దేవతగా ఊహించుకునే హక్కు తనకు ఉందని, ప్రతి వ్యక్తికి తనలో దేవుడిని, దేవతను పూజించే హక్కు ఉందని టిఎంసి ఎంపీ మహువా  మొయిత్రా మంగళవారం చేసిన వ్యాఖ్యలు పెను దుమారం రేపుతున్నాయి.

అవి ఆమె వ్యక్తిగత హోదాలో చేసిన వాఖ్యలని, వాటిని పార్టీ ఆమోదించదని ప్రకటించింది. పార్టీ ఈ విధంగా ట్వీట్ చేసింది: “#IndiaTodayConclaveEast2022లో @MahuaMoitra చేసిన వ్యాఖ్యలు, కాళీ దేవిపై ఆమె వ్యక్తం చేసిన అభిప్రాయాలు ఆమె వ్యక్తిగత హోదాలో చేసినవి. ఏ పద్ధతిలో లేదా రూపంలో పార్టీ వాటిని ఆమోదించడం లేదు. ఇలాంటి వ్యాఖ్యలను ఆల్ ఇండియా తృణమూల్ కాంగ్రెస్ తీవ్రంగా ఖండిస్తోంది”.

 కాగా, కాళీ దేవిపై ఆమె చేసిన వ్యాఖ్యలతో హిందువుల మతపరమైన మనోభావాలను దెబ్బతీశారంటూ టిఎంసి ఎంపీ మహువా మొయిత్రాపై భోపాల్‌లోని జహంగీరాబాద్ స్థానిక నివాసి ఒకరు మంగళవారం ఫిర్యాదు చేశారు. తాము స్థానిక నివాసి నుండి ఐపీసీ సెక్షన్ 295 (ఎ)ని అమలు చేసే ఫిర్యాదును స్వీకరించామని, ఎఫ్‌ఐఆర్ నమోదు చేసే దిశగా ముందుకు సాగుతున్నామని క్రైమ్ బ్రాంచ్ డిప్యూటీ కమిషనర్ ఆఫ్ పోలీస్ అమిత్ కుమార్ తెలిపారు.

భారతీయ శిక్షాస్మృతిలోని సెక్షన్ 295 (ఎ) ఉద్దేశపూర్వక మరియు హానికరమైన చర్యలతో వ్యవహరిస్తుంది, దాని మతం లేదా మత విశ్వాసాలను అవమానించడం ద్వారా ఏదైనా తరగతి మతపరమైన భావాలను ఆగ్రహానికి గురిచేయడానికి ఉద్దేశించబడింది.“మహువా మోయిత్రా ప్రకటనలు హిందూ మతపరమైన మనోభావాలను దెబ్బతీశాయి. హిందూ దేవుళ్లను, దేవతలను అవమానిస్తే సహించబోము” అని  మధ్యప్రదేశ్ ముఖ్యమంత్రి శివరాజ్ సింగ్ చౌహాన్ స్పష్టం చేశారు. ఈ అంశంపై రాష్ట్రంలో మరిన్ని ఎఫ్‌ఐఆర్‌లు నమోదయ్యే అవకాశం ఉందని సంబంధిత వర్గాలు తెలిపాయి.

మొయిత్రా బుధవారం ట్వీట్ చేస్తూ, “జై మా కాళీ! బెంగాలీలు దేవతను నిర్భయంగా ఆరాధిస్తారు. సంతుష్ట పరచే పని చేయరు” అని తెలిపారు. బీజేపీ ఫిర్యాదుపై మహువా ట్విటర్ వేదికగా స్పందిస్తూ, రండి చూసుకుందాం బీజేపీ! అన్నారు. ‘‘నేను కాళీ మాత ఆరాధకురాలిని. నేను దేనికీ భయపడను. మీ మూర్ఖులకు, మీ గూండాలకు, మీ పోలీసులకు, కచ్చితంగా మీ ట్రోల్స్‌కు నేను భయపడను. సత్యానికి మద్దతిచ్చే శక్తుల అవసరం లేదు’’ అని పేర్కొన్నారు.

పశ్చిమ బెంగాల్‌లోని బీజేపీ యూనిట్ మహువా మోయిత్రా కాళీ దేవతను “అవమానించినందుకు” నిర్మాణ తెలుపుతూ పోలీసులకు  ఫిర్యాదు చేసింది. ఆమెను వెంటనే అరెస్టు చేయాలని డిమాండ్ చేసింది. ఆమె వాఖ్యాలను కేవలం టిఎంసి ఖండించడంతో సరిపోదని, బెంగాల్ బిజెపి అధ్యక్షుడు సుకాంత మజుందార్ స్పష్టం చేశారు. ముందుగా ఆమెను పార్టీ నుండి బహిష్కరించడం లేదా సస్పెండ్ చేయడం చేయాలని డిమాండ్ చేశారు.

మహువా మొయిత్రా వ్యాఖ్యల బాధ్యత నుంచి టీఎంసీ తప్పించుకోలదని పేర్కొంటూ ఆమె వాఖ్యాలను ఆమోదించని పక్షంలో ఆమెపై ఎందుకని చర్య తీసుకోవడం లేదని ఆయన ప్రశ్నించారు.  మరోవంక ఆమె వాఖ్యలకు నిరసనగా బిజెపి మహిళా మోర్చా కార్యకర్తలు బుధవారం నిరసన ప్రదర్శన నిర్వహించారు, పోలీస్ స్టేషన్‌కి వెళ్లి, ఆమెను అరెస్టు చేయాలని డిమాండ్ చేశారు.

“సాంప్రదాయ మతంలో కాళీ తల్లిని మద్యం, మాంసం తినే దేవతగా పూజించరు. దుష్ట విధ్వంసక శక్తికి ప్రతీకగా కాళీ మాతను హిందువులు చాలా కాలంగా ఆరాధిస్తున్నారు. కాళి మాత గురించి ఈ ప్రకటన వెలుగులో నేను ఆమెను (మహువా మోయిత్రా) అరెస్టు చేయాలని డిమాండ్ చేస్తున్నాను’ అని మజుందార్ ట్వీట్ చేశారు.

కాళీ దేవిపై వివాదాస్పద వ్యాఖ్యలు చేసినందుకు దుర్గాపూర్‌లోని ఆండాల్ పోలీస్ స్టేషన్‌లో టిఎంసి లోక్‌సభ ఎంపిపై బిజెపి మీడియా సెల్ కన్వీనర్ జితేన్ ఛటర్జీ ఫిర్యాదు చేశారు.

ఇలా ఉండగా, తన వాఖ్యలు పెను దుమారం రేపడం, పార్టీని ఇరకాటంలో పడవేయడంతో మెయిత్రా పార్టీని వీడుతున్నారనే  సంకేతాలు కనిపిస్తున్నాయి. ఆమె పార్టీ అధికారిక ట్విట్టర్‌ ఖాతాను అన్‌ఫాలో కావడంతో ఈ ప్రచారం జరుగుతోంది.

 దర్శకురాలు, నటి లీనా మణిమేగలై తాజా చిత్రం కాళీ ఈ పోస్టర్‌పై దుమారం రేగింది. ఆ పోస్టర్‌పై ఇటీవల జరిగిన కాన్‌క్లేవ్‌లో లీనాకు మద్దతుగా మహువా స్పందిస్తూ. ప్రతి వ్యక్తికి తమ దారిలో దేవుడిని ఆరాధించే హక్కు ఉందని చెప్పారు.

సిక్కిం, భూటాన్‌ వెళితే.. పూజ చేసేటప్పుడు.. దేవుళ్లకు మద్యాన్ని (విస్కీ)ని ప్రసాదంగా ఇస్తారని, ఉత్తరప్రదేశ్‌లో కూడా దేవుడికి ఇదే అందిస్తారని, అలా చెబితే.. తాను దేవుణ్ని తిట్టినట్లేనంటారని ఆమె పేర్కొన్నారు. ఈ వ్యాఖ్యలు తృణమూల్‌ కాంగ్రెస్‌కు మింగుడు పడలేదు. ఈ నేపథ్యంలోనే ఆమె టిఎంసి ట్విట్టర్‌ ఖాతాను అన్‌ఫాలో చేస్తున్నట్లు తెలుస్తోంది.