తాడిపత్రిలోని జేసీ ప్రభాకర్ ఇంట్లో ఈడీ సోదాలు

తాడిపత్రి మాజీ ఎమ్మెల్యే, మున్సిపల్ చైర్మన్ జేసీ ప్రభాకర్ రెడ్డితో పాటు ఆయన సోదరుడు, మాజీ ఎంపీ జేసీ దివాకర్ రెడ్డి ముఖ్య అనుచరుడు క్లాస్ వన్ కాంట్రాక్టర్ గోపాల్ రెడ్డి ఇళ్లలో ఎన్‌ఫోర్స్‌మెంట్ డైరెక్టరేట్  అధికారులు తనిఖీలు నిర్వహిస్తున్నారు.  జేసీ ప్రభాకర్ రెడ్డి సహా కుటుంబ సభ్యుల సెల్‌ఫోన్లను ఈడీ అధికారులు స్వాధీనం చేసుకున్నారు.
బయట వ్యక్తులు ఎవరూ ఇంట్లోకి రాకుండా ఈడీ సోదాలు నిర్వహిస్తోంది. ఈడీ అధికారులు ప్రత్యేక బృందాలుగా ఏర్పడి మరీ సోదాలు నిర్వహిస్తున్నారు.  గతంలో అశోక్ లేల్యాండ్ నుంచి కొనుగోలు చేసిన వాహనాల విషయంలో జరిగిన లావాదేవీలపై ఈ సోదాలు నిర్వహిస్తున్నట్టు తెలుస్తోంది. ఫోర్జరీ డాక్యుమెంట్లతో వాహనాల రిజిస్ట్రేషన్లపై ఆరా తీశారు.
 స్క్రాప్‌ కింద వాహనాలు కొనుగోలు చేసి నకిలీ ఇన్వాయిస్‌తో జేసీ ట్రావెల్స్‌ నాగాలాండ్‌లో అక్రమ రిజిస్ట్రేషన్లు చేసింది. సుమారు వందకు పైగా వాహనాలకు అక్రమ రిజిస్ట్రేషన్లు చేసినట్లు గుర్తించారు.
తనిఖీల సమయంలో జేసీ సోదరులు ఇళ్లలోనే ఉన్నారు.
శుక్రవారం తెల్లవారు జామునే ఈడీ అధికారులు ఇంటికి వచ్చి సోదాలు మొదలుపెట్టారు. ప్రభాకర్ రెడ్డి ఇంటికి ఈడీ అధికారులు వచ్చారని తెలిసి పెద్ద ఎత్తున కార్యకర్తలు చేరుకుంటున్నారు.