సీఎం కేసీఆర్ పై నిరసనల సెగ.. నేడే బిజెపి దీక్షలు 

“రాజ్యాంగాన్ని ముట్టుకొని చూడు. ఇంకో సారి రాజ్యాంగం గురించి మాట్లాడితే చూరచూర అవుతావు బిడ్డా..’’ అని సీఎం కేసీఆర్‌ను బీజేపీ రాష్ట్ర అధ్యక్షుడు, ఎంపీ బండి సంజయ్‌ హెచ్చరించారు. బుధవారం సంజయ్‌ ఢిల్లీలోని తెలంగాణ భవన్‌లో అంబేడ్కర్‌ విగ్రహానికి పాలాభిషేకం చేశారు. భారత రాజ్యాంగాన్ని చూసి ప్రపంచమంతా ఆశ్చర్యపడుతున్నదని, అభ్యంతరాలు ఉంటే చెప్పకుండా రాజ్యాంగాన్నే తిరగ రాయాలనడం సరికాదని చెప్పారు.

దేశంలో బీజేపీ అధికారంలోకి వస్తే రాజ్యాంగాన్ని తిరగరాస్తుందని గతంలో కొన్ని పార్టీలు భయభ్రాంతులకు గురిచేశాయని, ఇప్పుడు బీజేపీ రాజ్యాంగాన్ని తిరగ రాసిందా? అని నిలదీశారు. గతంలో ఇందిరా గాంధీ కూడా రాజ్యాంగంలోని ప్రాథమిక సూత్రాలను మార్చేందుకు కుట్ర పన్ని భంగపడ్డారన్నారు. ఆఫ్ర్టాల్‌ కేసీఆర్‌ ఎంతని ఎద్దేవా చేశారు.

కేసీఆర్‌ వ్యాఖ్యలకు నిరసనగా గురువారం బీజేపీ రాష్ట్ర ప్రధాన కార్యాలయంలో పార్టీ ఓబీసీ మోర్చా జాతీయ అధ్యక్షుడు కె.లక్ష్మణ్‌, శాసనసభాపక్ష నేత రాజాసింగ్‌, జీహెచ్‌ఎంసీ కార్పొరేటర్లు ఉదయం 11 గంటల నుంచి సాయంత్రం 4 గంటల వరకు నిరసన దీక్ష చేస్తారని సంజయ్‌ వెల్లడించారు. రాష్ట్రంలోని అన్ని మండల కేంద్రాల్లో ఉదయం 10 నుంచి మధ్యాహ్నం 12 గంటల వరకు దీక్ష చేపట్టాలంటూ పార్టీ శ్రేణులకు సూచించారు.

‘‘అంబేడ్కర్‌ రాజ్యాంగాన్ని కూడా మార్చాలా? నీ మాటలపై దేశమంతా చర్చ జరగాలా? అవినీతి సామ్రాట్టువు నువ్వు. గుర్తు పెట్టుకో. దేశంలో చర్చ జరిగేది నీ అవినీతి పైనే’’ అంటూ సీఎం కేసీఆర్‌పై బీజేపీ జాతీయ ఉపాధ్యక్షురాలు డీకే అరుణ ధ్వజమెత్తారు. దళితుడిని సీఎం చేస్తానని చెప్పి తాను సీఎం అయిన కేసీఆర్‌.. రాజ్యాంగాన్నే మార్చాలంటున్నారని దుయ్యబట్టారు. ఏనాడైనా అంబేడ్కర్‌ జయంతి, వర్ధంతి కార్యక్రమాల్లో కేసీఆర్‌ పాల్గొన్నాడా? అని ప్రశ్నించారు.