పంజాబ్ లో ఫ్లై ఓవర్పై చిక్కుకుపోయిన ప్రధాని

పంజాబ్ పర్యటనకు వెళ్లిన ప్రధాని నరేంద్ర మోదీ నిరసనకారులు రహదారులను దిగ్బంధనం చేసిన కారణంగా ఒక ఫ్లై ఓవర్ పై కొద్దిసేపు ఆగిపోవలసి వచ్చింది. దానితో తన కార్యక్రమాలను రద్దుచేసుకొని, వెనుతిరిగారు. ఆందోళనకారులు నిరసన చేపట్టడంతో ప్రధాని కాన్వాయ్ 20 నిమిషాల పాటు ఫ్లై ఓవర్పై చిక్కుకుపోయింది. పంజాబ్ ప్రభుత్వ భద్రతా వైఫల్యంపై కేంద్ర హోం శాఖ ఆగ్రహం వ్యక్తం చేసింది.

రాష్ట్ర ప్రభుత్వ నిర్లక్ష్యం వల్లే ఇలాంటి పరిస్థితి తలెత్తిందని మండిపడింది. రాష్ట్ర ప్రభుత్వం నుండి నివేదిక కోరింది. ‘ప్రాణాలతో బటిండా విమానాశ్రయానికి చేరుకున్నా. మీ ముఖ్యమంత్రికి థాంక్స్” అని ప్రధాని మోదీ ఈ సందర్భంగా అధికారులతో అన్నట్టు ఏఎన్ఐ వార్తాసంస్థ ట్వీట్ చేసింది.

ప్రధాన మంత్రి నరేంద్ర మోదీ పంజాబ్ పర్యటనలో భద్రతా లోపం వెల్లడికావడంతో కేంద్ర మంత్రి స్మృతి ఇరానీ తీవ్ర ఆగ్రహం వ్యక్తం చేశారు.  మోదీని కాంగ్రెస్ ద్వేషిస్తుందని అందరికీ తెలుసునన్నారు. భారత దేశ ప్రధాన మంత్రికి హాని చేసేందుకు ఆ పార్టీ ప్రయత్నించిందని ఆరోపించారు.

ప్రధాని నరేంద్రమోదీ బుధవారంనాడు పాల్గొనాల్సిన ఫిరోజ్‌పూర్ ర్యాలీకి వర్షం అవాంతరం కలిగించింది. ఆ తర్వాత భద్రతా కారణాల రీత్యా ప్రధాని ర్యాలీ రద్దయింది. ప్రధాని భటిండా నుంచి ఫిరోజ్‌పూర్ బయలుదేరిన సమయలో వర్షం పడటంతో ఆయన రాక కోసం సభాస్థలిలో ఎదురుచూస్తున్న జనం చెల్లాచెదురయ్యారు.

కుర్చీలు, బీజేపీ నేతల కటౌట్లు తీసుకుని తలకు అడ్డుపెట్టుకోవడం కనిపించింది. ముందుగా నిర్ణయించిన ప్రకారం మధ్యాహ్నం 1.30 గంటలకు ర్యాలీ ప్రారంభం కావాల్సి ఉంది. ఆ తర్వాత ప్రధాని ర్యాలీ రద్దయినట్టు తెలియడం, వర్షం కూడా పడటంతో జనం సభాస్థలి నుంచి వెనక్కి మళ్లారు.