బండి సంజయ్ విడుదలకు హైకోర్టు ఆదేశం

బీజేపీ రాష్ట్ర అధ్యక్షుడు  బండి సంజయ్ కు హైకోర్టులో ఊరట లభించింది.  వ్యక్తిగత పూచీకత్తుపై విడుదల చేయాలని హైకోర్టు ఆదేశించింది. కరోనా నిబంధనలు ఉల్లంఘించారని  రిమాండ్ రిపోర్టు ఇవ్వడం సరికాదని స్పష్టం చేస్తూ, దానిని హైకోర్టు. కొట్టివేసింది.

సంజయ్ ను రూ.40,000 పర్సనల్ బాండ్ పైన విడుదల చేయాలని హైకోర్టు ఆదేశించింది. బండి సంజయ్ అరెస్ట్ అక్రమమని,అరగంటలో కేసు, అరెస్ట్ , రిమాండ్ చేయడంలో మీ ప్రత్యేక శ్రద్ధ ఏంటని పోలీసులను ప్రశ్నించింది.  పోలీసులు పెట్టిన 333 సెక్షన్ అక్రమమని, ఎఫ్​ఐఆర్ లో నుండి ఆ సెక్షన్ తొలగించాలని పేర్కొంటూ చట్టాన్ని అందరికి సమానంగా వర్తింపజేయాలని ఆదేశించింది.

.బండి సంజయ్ ను విడుదల  చేయాలని జైళ్లశాఖ డీజీకి  హైకోర్టు ఆదేశమిచ్చింది. రెండు విషయాలలో పోలీసుల తీరును  న్యాయస్థానం తప్పబట్టింది.  పోలీస్ అధికారి అరెస్టుకు ముందు, తర్వాత దాఖలైన  ఎఫ్ఐఆర్ ను ప్రస్తావిస్తూ  రాత్రి 10:50 గంటలకు,  ఆ తర్వాత రాత్రి 11 గంటల 15 నిమిషాలకు ఎఫ్ఐఆర్ సరైంది కాదని భావించింది.

బండి సంజయ్ కుడిచేయి వేలికి గాయమైందని చెప్పి ఎఫ్ఐఆర్ లో  సెక్షన్ 333 అదనంగా చేర్చారని, కానీ రిమాండ్ రిపోర్టులో మాత్రం ఇంకా మెడికల్ రిపోర్ట్ అందాల్సి ఉందని పోలీసులు చెప్పారని కోర్టు  తెలిపింది.  కోర్టు ఈ విషయాన్ని పరిగణనలోకి తీసుకోకుండానే 17 వరకు రిమాండ్ ఇవ్వడం అనేది సరైంది కాదని అభిప్రాయపడింది.

ప్రభుత్వానికి నోటీసులు ఇచ్చిన హైకోర్టు.. తదుపరి విచారణను ఈ నెల 7 కు వాయిదా వేసింది. ఉద్యోగ,ఉపాధ్యాయుల బదిలీల కోసం ప్రభుత్వం జారీ చేసిన 317 జీవో రద్దు చేయాలని  ఈ నెల 2న కరీంనగర్ లో జాగరణ దీక్షకు దిగిన బండి సంజయ్ ను పోలీసులు అరెస్ట్ చేశారు.   కరీంనగర్ జిల్లా కోర్టులో హాజరు పర్చగా  బండి సంజయ్ కు 14 రోజుల జ్యుడిషియల్ రిమాండ్ విధించింది.