ప్రజాస్వామ్యంలో జవాబుదారీతనం అత్యంత ప్రధానం

పిఎసి ద్వారానే పౌరులు ప్రభుత్వ ఆర్థిక స్థితిగతులను తనిఖీ చేస్తారని తెలిపారు. మహాత్మా గాంధీ ఆశయాల, అంచనాలకు అనుగుణంగా పిఎసి పనిచేస్తోందని చెప్పారు.  అక్రమాలు, లోటుపాట్లను గుర్తించడం కోసం ప్రభుత్వ వ్యయాలను పిఎసి పరిశీలిస్తుందని అంటూ, ఈ కమిటీ కేవలం న్యాయపరమైన కోణంలోనే కాకుండా దేశ ఆర్థిక వ్యవస్థ, వివేకం, జ్ఞానం, ఔచిత్యం దృష్టితో కూడా దీన్ని పరిశీలించాలని పేర్కొన్నారు.

సంక్షేమ బాధ్యతలను అభివృద్ధి అవసరాలతో ముడిపెట్టి ప్రభుత్వాలు ఉచిత తాయిలను ప్రకటించడంపై విస్తృత స్థాయి చర్చ జరగాల్సిన అవసరం ఉందని ఉప రాష్ట్రపతి వెంకయ్య నాయుడు ఈ సందర్భంగా సూచించారు. 

విస్తృతస్థాయి చర్చ జరగడానికి వీలుగా పార్లమెంటుకు చెందిన ప్రజాపద్దుల కమిటీ (పిఎసి) దీన్ని పరిశీలించాలని ఆయన కోరారు. ఏడాదికి కనీసం 100 రోజులు పార్లమెంటు, రాష్ట్రాల చట్ట సభలు 90 రోజులు సమావేశం కావాలని ఉపరాష్ట్రపతి స్పష్టం చేస్తూ, ఈ అంశంపై రాజకీయ ఏకాభిప్రాయం ఉండాలని పేర్కొన్నారు. 

పబ్లిక్‌ అకౌంట్స్‌ కమిటీతో పాటు పబ్లిక్‌ ఎస్టిమేట్స్‌ కమిటీ, పబ్లిక్‌ అండర్‌ టేకింగ్స్‌ కమిటీ ప్రభుత్వ కార్యకలాపాలు, ఖర్చులపై ‘శాశ్వత నిఘా’ని ఏర్పరుస్తాయని పేర్కొన్నారు. అభివృద్ధి చెందుతున్న ఆర్థిక వ్యవస్థల్లో జవాబుదారీతనం, పారదర్శకత, సుపరిపాలనను నిర్ధారించడం ద్వారా వ్యర్థమైన వ్యయాలను తనిఖీ చేయడానికి పిఎసి దోహదం చేస్తుందని తెలిపారు.

దేశ నిర్మాణంలో ప్రజాస్వామ్య సంస్థల పాత్ర కీలకమైనదని లోక్‌సభ స్పీకర్‌ ఓం బిర్లా తెలిపారు. ప్రజల సమస్యలను పరిష్కరించడానికి, వారి అంచనాలను నెరవేర్చడానికి సమర్థవంతమైన వేదికలుగా పిఎసి లాంటి సంస్థలు వ్యవహరిస్తాయని చెప్పారు. పార్లమెంటు పిఎసి, రాష్ట్రాల పిఎసిల మధ్య ఉమ్మడి ప్రయోజనాలకు సంబంధించిన అనేక సమస్యలు ఉన్నందున ఒక ఉమ్మడి కమిటీ ఉంటే బావుంటుందని సూచించారు.