జగన్ ప్రభుత్వంపై కోర్టు ధిక్కారణ చర్యలు!

వైఎస్ జగన్ మోహన్ రెడ్డి  ప్రభుత్వానికి హైకోర్టులో వరుస ఎదురుదెబ్బలు తగులుతున్నాయి. తాజాగా ఉపాధి హామీ పథకం బిల్లుల విషయంలో ఏపీ ప్రభుత్వ తీరుపై హైకోర్టు ఆగ్రహం వ్యక్తం చేసింది. ఉపాధి హామీ పథకం వేతనదారులకు బిల్లులు చెల్లించక పోవడంపై మండిపడింది. ఈ నెల 15వ తేదీలోగా బిల్లులు చెల్లించకపోతే కోర్టు ధిక్కారణ చర్యలు తీసుకుంటామని ప్రభుత్వాన్ని హైకోర్టు హెచ్చరించింది.

విజిలెన్స్‌ విచారణ పేరుతో బిల్లుల చెల్లింపును ఎంతకాలం నిలుపుదల చేస్తారని మండిపడింది. పిటిషనర్లు చేసిన పనుల విషయంలో విచారణ జరుపుతున్నప్పుడు కనీసం వారికి నోటీసులు ఇవ్వకపోవడం ఏమిటని నిలదీసింది. తమ ఉత్తర్వులను ఉల్లంఘించిన అధికారులపై కోర్టు ధిక్కరణ చర్యలు తీసుకుంటామని హెచ్చరించింది. ప్రభుత్వం జమచేసిన నిధులను కాంట్రాక్టర్లకు చెల్లించే విషయంలో సహకరించని సర్పంచ్‌లపై కూడా చర్యలు తీసుకుంటామని స్పష్టం చేసింది.

రెండు వారాల క్రితం 494 కేసుల్లో బిల్లుల చెల్లింపులు చేయాలని ఆదేశిస్తే కేవలం 25 కేసుల్లో మాత్రమే చెల్లింపులు చేయడం పట్ల హైకోర్టు తీవ్ర అభ్యంతరం వ్యక్తం చేసింది. అయితే, సర్పంచ్ అకౌంట్లోకి డబ్బులు వేస్తే వారు కాంట్రాక్టర్‌కు చెల్లించడం లేదని ప్రభుత్వ తరఫు న్యాయవాది పేర్కొన్నారు. దీంతో వివరాలు ఇస్తే వారిపై కూడా కోర్టు ధిక్కార చర్యలు తీసుకుంటామని హైకోర్టు తేల్చి చెప్పింది.