కృష్ణా జలాలపై కేసీఆర్ వైఖరేంటి?

సుప్రీంకోర్టులో కృష్ణాజలాల వివాదం నడుస్తుండగా, ట్రిబ్యునల్‌ ఏర్పాటు చేయాలని కేంద్రానికి రాష్ట్ర ప్రభుత్వం లేఖ రాయడం, 8 నెలల తర్వాత వెనక్కి తీసుకోవడంలో మతలబేంటో ప్రజలకు చెప్పాలని డిమాండ్‌ చేశారు. తెలంగాణకు రావాల్సిన నీటి వాటాల విషయంలో కేసీఆర్ పట్టించుకోవడం లేదని.. అందుకే జగన్ దోచుకుపోతున్నాడని మండిపడ్డారు.

‘తెలంగాణ ప్రజలను మోసం చేసిన ఘనుడు కేసీఆర్. కమీషన్ల కోసం పక్క రాష్ట్రంతో కుమ్మక్కయ్యాడు. బహిరంగంగా ఎవరి వాటా ఎంతనేది మేం బహిరంగంగా చెబుతున్నా సీఎం స్పందించడం లేదు. రెండు రాష్ట్రాల సీఎం ప్రజలను మోసం చేస్తున్నారు’ అంటూ ధ్వజమెత్తారు. అపెక్స్ కౌన్సిల్ సమావేశం ఏర్పాటు చేయాలని కోరినప్పటికీ సీఎం కేసీఆర్‌కు పాల్గొనేందుకు సమయం లేదంట? అందుకే వాయిదా వేయించాడు. పునర్విభజన హామీలు ఉల్లంఘించి రెండు రాష్ట్రాల సీఎంలు మోసం చేస్తున్నారని దుయ్యబట్టారు. 

హుజురాబాద్ ఎన్నికల కోసమే ఇద్దరు ముఖ్యమంత్రులు హైడ్రామా చేస్తున్నారని విమర్శించారు. తెలంగాణకు అన్యాయం జరిగితే బీజేపీ తప్పకుండా అండగా ఉంటుందని బండి సంజయ్ స్పష్టం చేశారు. దళితులంతా ఏకమై సీఎం కేసీఆర్‌ను గద్దె దించాలని బీజేపీ దళిత మోర్చా జాతీయ అధ్యక్షుడు లాల్‌సింగ్‌ ఆర్య పిలుపిచ్చారు.

కాగా, తెలుగు రాష్ట్రాల సీఎంలు కేసీఆర్‌, జగన్‌ కలిసి ఆడుతున్న నాటకమే తాజా జల వివాదాలని సీనియర్‌ నేత మురళీధర్‌రావు భువనగిరిలో విమర్శించారు. కేంద్రం జారీచేసిన గెజిట్‌ నోటిఫికేషన్‌.. నీటి రాజకీయాలకు ముగింపు పలుకుతుందని బిజెపి మాజీ జిల్లా అధ్యక్షుడు  ఎన్‌.ఇంద్రసేనారెడ్డి స్పష్టం చేశారు.