కశ్మీరి కుంకుమ పువ్వు ప‌రిమ‌ళాల‌ను ప్ర‌పంచ‌వ్యాప్తం చేద్దాం

ప్రపంచంలో కశ్మీరీ కేస‌ర్ (కశ్మీరీ కుంకుమ పువ్వు)కు ప్రత్యేక స్థానం ఉన్న‌దని ప్రధాని నరేంద్ర మోదీ తెలిపారు. ఇతర దేశాల్లో లభించే కుంకుమ పువ్వుకు, కశ్మీర్‌లో ఉత్పత్తయ్యే కుంకుమ పువ్వుకు నాణ్యత విషయంలో చాలా తేడా ఉంటుంద‌ని చెప్పారు. మ‌న్ కీ బాత్ కార్య‌క్ర‌మంలో భాగంగా ఆదివారం ఆలిండియా రేడియోలో మాట్లాడిన ప్ర‌ధాని నాణ్యత విష‌యంలో ప్ర‌పంచంలో ల‌భించే ఇత‌ర అన్ని కుంకుమ పువ్వులకంటే కశ్మీర్‌ కుంకుమ పువ్వు చాలా విశిష్టమైన‌ద‌ని పేర్కొన్నారు.

కశ్మీరీ కుంకుమ పువ్వు ఇతర దేశాల్లో దొరికే కుంకుమ పువ్వుకు పూర్తిగా భిన్నమైనదని ప్ర‌ధాని తెలిపారు. దీనికి జియోగ్రాఫికల్ ఇండికేషన్ (జీఐ) ట్యాగ్ ఈ ఏడాదే వచ్చిందని, ఇక‌ అంతర్జాతీయ మార్కెట్లో ఈ పువ్వుకు న్యాయమైన స్థానం క‌ల్పించే ప్ర‌య‌త్నం చేస్తున్నామ‌ని చెప్పారు. ఆత్మనిర్బర్ భారత్ పథకంలో భాగంగా దేశ ప్ర‌జ‌లు కశ్మీరీ కుంకుమ పువ్వును కొనాలని కోరారు. కశ్మీరి కుంకుమ పువ్వు గురించి అక్బ‌ర్ సంస్థానంలోని అబుల్ ఫ‌జ‌ల్ మొద‌టిసారి వ‌ర్ణించార‌ని ప్ర‌ధాని గుర్తుచేశారు.