రైతు బిల్లులపై ప్రతిపక్షాల దుష్ప్రచారం 

రైతు బిల్లులతో మార్కెట్‌ యార్డ్‌ లను మూసేస్తారన్నది దుష్ప్రచారం మాత్రమేనని బిజెపి జాతీయ ప్రధాన కార్యదర్శి దగ్గుబాటి పురంధేశ్వరి ధ్వజమెత్తారు. రైతు బిల్లులపై ప్రతిపక్షాలన్నీ ఏకమై రాజకీయం చేస్తున్నాయని ఆమె దయ్యబట్టారు. అన్నదాతలు ఢిల్లీ రహదారుల్లో అలుపెరుగని పోరాటం చేస్తున్న నేపథ్యంలో.. విశాఖలోని మీడియా సమావేశంలో దగ్గుబాటి పురంధేశ్వరి మాటలు ప్రాధాన్యతను సంతరించుకున్నాయి.

ఎస్సీ, ఎస్టీ స్కాలర్‌షిప్‌ వివరాలు రాష్ట్ర ప్రభుత్వాలు పూర్తి వివరాలతో పంపితే వెంటనే మంజూరు చేస్తామని ఆమె స్పష్టం చేశారు. ఎపిలో వైసిపి ప్రైవేటు కాలేజీల్లో చదివే ఎస్సీ, ఎస్టీ విద్యార్థుల స్కాలర్‌ షిప్‌ను రద్దు చేస్తూ నిర్ణయాన్ని తీసుకోవడం దుర్మార్గమని దుయ్యబట్టారు.

పేదలకు ఇళ్ల పట్టాలు ఇచ్చామని వైసిపి చెబుతోందని కానీ సైట్‌ పొజిషన్‌ సర్టిఫికెట్‌ మాత్రమే ఇచ్చినట్టు తమ దఅష్టికి వచ్చిందని పురంధేశ్వరి పేర్కొన్నారు. రాష్ట్రంలో పెట్టుబడులు పెట్టే వాతావరణం లేక పెట్టుబడిదారులు వెనక్కి వాపోతున్నారని విచారం వ్యక్తం చేశారు. దీనికి వైసిపి ప్రభుత్వ తీరే కారణమని ధ్వజమెత్తారు.

అమరావతిపై విలేకర్లు అడిగిన ఓ ప్రశ్నకు సమాధానంగా… రాజధాని అమరావతి విషయం కోర్టులో ఉందని, దీనిపై స్పందించడం సరికాదని చెప్పారు. దీనిపై బిజెపి వైఖరిని సోము వీర్రాజు ఇప్పటికే స్పష్టం చేశారని తెలిపారు. తిరుపతి ఉప ఎన్నిక పై రాష్ట్ర నాయకత్వం ఆధ్వర్యంలో ముందుకు వెళతామని పురంధేశ్వరి పేర్కొన్నారు.