ద‌లై లామా వార‌సుడిని ఎంచుకునే హ‌క్కు టిబెటన్ల‌కే  

ద‌లైలామా వార‌సుడిని ఎంచుకునే హ‌క్కు టిబెటన్ల‌కే క‌ల్పించే బిల్లుకు ఆమోదం తెలపడం ద్వారా అమెరికా కాంగ్రెస్ చైనా ప్రభుత్వాన్ని ఇరకాటంలో పడవేసింది. ద టిబెట‌న్ పాల‌సీ అండ్ స‌పోర్ట్ యాక్ట్ ఆఫ్ 2020 (టీపీఎస్ఏ)పై చైనా మండిప‌డుతోంది. త‌మ అంత‌ర్గ‌త వ్య‌వ‌హారాల్లో త‌ల‌దూరిస్తే ప‌రిణామాలు తీవ్రంగా ఉంటాయ‌ని హెచ్చ‌రిస్తోంది. 

ఈ తాజా చ‌ట్టం టిబెట్‌లోని ప్ర‌ధాన న‌గ‌ర‌మైన లాసాలో అమెరికా కాన్సులేట్ ఏర్పాటుతోపాటు త‌ర్వాతి ద‌లై లామాను ఎంచుకునే హ‌క్కును టిబెట‌న్ల‌కే క‌ట్ట‌బెడుతోంది. ఆ నిర్ణ‌యం ప్ర‌స్తుత ద‌లైలామా, టిబెట‌న్ బౌద్ధ నాయకులూ, టిబెట్ ప్ర‌జ‌లదే అని టీపీఎస్ఏ స్ప‌ష్టం చేస్తోంద‌ని సెంట్ర‌ల్ టిబెట‌న్ అడ్మినిస్ట్రేష‌న్ ఒక ప్ర‌క‌ట‌న‌లో తెలిపింది.

ఇప్ప‌టికే ఈ బిల్లుకు హౌస్ ఆఫ్ రిప్ర‌జెంటేటివ్స్ ఆమోదం తెలిపింది. ఒక విధంగా ఈ బిల్లు చైనాలో టిబెట్ ప్రజల స్వయం ప్రతిపత్తిని చాటిచెప్పిన్నట్లు అయింది. ఒక‌వేళ ఈ వ్య‌వ‌హారంలో చైనా ప్ర‌భుత్వ అధికారులు జోక్యం చేసుకుంటే  తీవ్ర‌మైన ఆంక్ష‌లు ఎదుర్కోవ‌డానికి సిద్ధంగా ఉండాల‌ని ఆ ప్ర‌క‌ట‌న‌లో హెచ్చరించడం గమనార్హం.

ఈ వ్య‌వ‌హారంతో కంగుతిన్న చైనా త‌మ అంత‌ర్గ‌త వ్య‌వ‌హారాల్లో జోక్యం చేసుకోవ‌ద్ద‌ని అమెరికాను హెచ్చరించింది. దీనిపై సంత‌కం చేయ‌కూడ‌ద‌ని అధ్య‌క్షుడు డొనాల్డ్ ట్రంప్‌ను చైనా విదేశాంగ శాఖ డిమాండ్ చేసింది. ఈ చ‌ట్టం టిబెట్ స్వాతంత్య్ర  పోరాటానికి ఓ విజ‌య‌మ‌ని సెంట్ర‌ల్ టిబెట‌న్ అడ్మినిస్ట్రేష‌న్ అధ్య‌క్షుడు లాబ్‌సాంగ్ సాంగాయ్  హర్షం ప్రకటించారు.

ఈ చ‌ట్టం కోసం తాము రెండేళ్లుగా డిమాండ్ చేస్తున్న‌ట్లు ఆయన చెప్పారు. చైనా ఇప్ప‌టికే త‌ర్వాతి ద‌లై లామాను నియ‌మించే ప్ర‌క్రియ‌ను మొద‌లుపెట్టిన నేప‌థ్యంలో అమెరికా ఈ చ‌ట్టాన్ని తీసుకురావ‌డం ప్రాధాన్య‌త సంత‌రించుకుంది. తమ కీలుబొమ్మ వ్యక్తిని దలైలామా వారసునిగా ప్రకటించడం ద్వారా బౌద్ధ ప్రజలు ఎవ్వరు తిరుగుబాటు చేయకుండా కట్టడి  చేయడం కోసం చైనా చాలాకాలంగా కుట్రపూరితంగా వ్యవహరిస్తున్నది.