హైదరాబాద్ నుండి నేరుగా అమెరికాకు విమానం 

బోయింగ్ 777-200 విమానాలతో నడిచే ఈ సర్వీసులో సీట్ల సామర్థ్యం 238 (8 ఫస్ట్ క్లాస్ + 35 బిజినెస్ క్లాస్ + 195 ఎకానమీ క్లాస్). హైదరాబాద్-అమెరికా-హైదరాబాద్ మధ్య ఏటా 7 లక్షల మందిమంది ప్రయాణికులు ప్రయాణించడానికి ఆస్కారమున్నా దానికి తగిన అవకాశాలు లేవు.

హైదరాబాద్ దక్షిణ, మధ్య భారతదేశానికి ప్రవేశ ద్వారంలాంటిది. ఇది సమీప నగరాల నుండి వచ్చే ప్రయాణీకులకు అనుకూలంగా కూడా ఉంటుంది. విజయవాడ, విశాఖపట్నం, నాగ్‌పూర్, భువనేశ్వర్, రాజమండ్రి, భోపాల్, తిరుపతిలాంటి నగరాల నుంచి అమెరికాకు యేటా దాదాపు 2,20,000 మంది ప్రయాణికుల డిమాండ్ ఉంది.  

అమెరికాలోని చికాగోను హైదరాబాద్‌ తో కలుపుతూ విమాన సదుపాయం కల్పించాలని చాలాకాలంగా డిమాండ్ ఉన్నట్లు జిఎంఆర్ హైదరాబాద్ అంతర్జాతీయ విమానాశ్రయం సిఇఓ ప్రదీప్ పణికర్ తెలిపారు.  ప్రమాణాల భద్రతపై దృష్టి సారించి, ప్రయాణీకులకు సేవ చేయడానికి, మరిన్ని దేశీయ, అంతర్జాతీయ నగరాలను కనెక్ట్ చేయడానికి తాము నిరంతరం కృషి చేస్తుంటామని ఆయన పేర్కొన్నారు.

ఇప్పుడు ఎయిర్ ఇండియా నుంచి అమెరికాకు నేరుగా విమానం రావడంతో ఈ ప్రాంతంలోని కార్పొరేట్ వర్గాలకు ఎంతగానో ఉపయోగపడ గలదని భావిస్తున్నారు. మరోవంక, రెండు తెలుగు రాష్ట్రాలకు చెందిన తెలుగువాళ్ల సంఖ్య అమెరికాలో  వేగంగా పెరుగుతోంది.

భారతదేశం నుండి చదువు కోసం విదేశాలకు వెళ్లే ప్రతి నలుగురు విద్యార్థులలో ఒకరు ఈ  రాష్ట్రాలకు చెందిన వారని తెలుస్తోంది. ప్రతి సంవత్సరం అమెరికాకు వచ్చే విదేశీ విద్యార్థుల సంఖ్యపరంగా భారతదేశం రెండోస్థానంలో ఉంది. అమెరికా-భారత్  విద్యార్థులలో, 50-65 శాతం మంది విద్యార్థులు తెలుగు రాష్ట్రాలకు చెందిన వారే.  అలాగే, హైదరాబాద్‌ కు  భారత ఫార్మా రాజధానిగా, టీకాల ఉత్పత్తి కేంద్రంగా కూడా పేరుంది.