టీఆర్ఎస్ కార్పొరేటర్లకు ప్రచారంలో పరాభవం 

మంత్రి గంగుల కమలాకర్, ఎమ్మెల్యే దానం నాగేందర్ కు మంగళవారం  ప్రచారంలో చేదు అనుభవం ఎదురైంది.  హిమాయత్​నగర్​లో వారు ప్రచారానికి వెళ్లగా తమకు వరద సాయం అందలేదని, వరదలతో కష్టాలు పడితే పట్టించుకోలేదని స్థానికులు తిరగబడ్డారు. చేసేదేం లేక వారు అక్కడి నుంచి వెనుదిరిగారు. 

ఇక ఉప్పల్​లో టీఆర్ఎస్ అభ్యర్థిని నిలదీశారు. వరద సాయం డబ్బులను మీరు మీరు పంచుకొని ఇప్పుడు ఓట్లకోసం మా వద్దకు వస్తారా అంటూ ఎదురు తిరిగారు. అల్వాల్ ఇన్​చార్జిగా ఉన్న ఎమ్మెల్యే పద్మాదేవేందర్ రెడ్డి ప్రచారంలో భాగంగా అభ్యర్థితో కలిసి జనం వద్దకు వెళ్లగా తమకేం చేయలేదని, ఓట్లు ఎలా వేయాలని ప్రశ్నించారు. డబుల్​ బెడ్​రూమ్​ఇండ్లు ఇస్తామని ఐదేళ్లయినా ఇవ్వలేదని మండిపడ్డారు. 

నేతలు  సముదాయించేందుకు ప్రయత్నించినా జనం వినలేదు. గుడిమల్కాపూర్​లోని భోజగుట్ట, వివేకానందనగర్​ కాలనీలో కూడా టీఆర్ఎస్​ నేతలను నిలదీశారు. తమకు డబుల్​బెడ్ రూమ్​ఇండ్లు ఇస్తామని నాలుగేళ్ల క్రితం ఖాళీ చేయించి ఇండ్లు ఇవ్వలేదని మండిపడ్డారు.